បរទេស៖ គ្រាប់បែកបានផ្ទុះនៅខេត្តជាប់ព្រំដែនភាគខាងត្បូងប្រទេសថៃ នៅមុនដំណើរទស្សនកិច្ចរបស់អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា នៅព្រឹកថ្ងៃអាទិត្យ។
យោងតាមសារព័ត៌មាន Bangkok Post ចេញផ្សាយនៅថ្ងៃទី២៣ ខែកុម្ភៈ ឆ្នាំ២០២៥ បានឱ្យដឹងថា នៅខេត្តយ៉ាឡា ជនស៊ីវិលម្នាក់បានស្លាប់ និងប៉ូលិស៧នាក់បានរងរបួស នៅពេលដែលគ្រាប់បែកមួយគ្រាប់បានផ្ទុះនៅមុខផ្សារទំនើបមួយកន្លែងក្នុងស្រុក Bannang Sata កាលពីយប់ថ្ងៃសៅរ៍។
ហេតុការណ៍នេះបានកើតឡើងនៅលើកំណាត់ផ្លូវលេខ១០ ទល់មុខ Mini BigC ស្ថិតក្នុងភូមិ ម២ ក្នុងសង្កាត់ Bannang Sata វេលាម៉ោងប្រហែល ៨ និង២០នាទីយប់ ពេលដែលសមត្ថកិច្ចមូលដ្ឋានចំនួន៧នាក់ កំពុងល្បាតក្នុងតំបន់នោះ។
លោកវីរសេនីយ៍ Worawit Na Nakhon ប្រធានស៊ើបអង្កេតប៉ុស្តិប៉ូលីស Bannang Sata បាននិយាយថា ការបំផ្ទុះនេះបានសម្លាប់បុរសម្នាក់ និងបានបណ្តាលឱ្យរងរបួសដល់មន្ត្រី និងជនស៊ីវិលបួននាក់ផ្សេងទៀត។
កន្លែងកើតហេតុត្រូវបានគេបិទ ខណៈដែលក្រុមអ្នកជំនាញផ្នែកកម្ចាត់គ្រាប់បែក និងមន្ត្រីកោសល្យវិច្ច័យបានចុះទៅប្រមូលភស្តុតាង៕
ប្រែសម្រួលៈ ណៃ តុលា
