សេអ៊ូល៖ ប្រទេសកូរ៉េខាងជើង បានគំរាមកាលពីថ្ងៃចន្ទថា នឹងចាត់វិធានការ “យ៉ាងម៉ឺងម៉ាត់” បន្ទាប់ពីក្រុម ឃ្លាំមើល ដឹកនាំដោយកូរ៉េខាងត្បូង ដែលអនុវត្តការដាក់ទណ្ឌកម្ម របស់អង្គការសហប្រជាជាតិ ប្រឆាំងនឹងកូរ៉េខាងជើង ជុំវិញកម្មវិធីនុយក្លេអ៊ែរ និងមីស៊ីល របស់ខ្លួន បានចាប់ផ្តើមសកម្មភាពជាផ្លូវការ នេះបើយោងតាមការចុះផ្សាយ របស់ទីភ្នាក់ងារសារព័ត៌មានយុនហាប់។
ការគំរាមកំហែងរបស់កូរ៉េខាងជើងបានកើតឡើងនៅពេលដែលក្រុមត្រួតពិនិត្យទណ្ឌកម្មពហុភាគី (MSMT) ដែលបង្កើតឡើងដោយកូរ៉េខាងត្បូង និងប្រទេសចំនួន ១០ ផ្សេងទៀតកាលពីខែតុលា បានសន្យាថា នឹងធានានូវការអនុវត្តពេញលេញ នៃទណ្ឌកម្មរបស់អង្គការសហប្រជាជាតិ ប្រឆាំងនឹងកូរ៉េខាងជើង នៅក្នុងកិច្ចប្រជុំ សម្ពោធគណៈកម្មាធិការដឹកនាំ របស់ខ្លួនកាលពីសប្តាហ៍មុន។
ដោយហៅក្រុម MSMT ថាជា “ក្រុមខ្មោចខុសច្បាប់ និងឧក្រិដ្ឋកម្ម” ប្រធានការិយាល័យគោលនយោបាយ ខាងក្រៅនៅក្រសួងការបរទេស កូរ៉េខាងជើងបានព្រមានថា កងកម្លាំងអរិភាពនឹងត្រូវ “ចំណាយប្រាក់ដ៏លើសលប់” សម្រាប់ការប៉ុនប៉ងរបស់ពួកគេ ដើម្បីរារាំងការអនុវត្តសិទ្ធិ អធិបតេយ្យភាព របស់កូរ៉េខាងជើង នេះបើយោងតាមទីភ្នាក់ងារ សារព័ត៌មានកណ្តាលកូរ៉េ។
មន្ត្រីរូបនេះបានបន្ដថា “កូរ៉េខាងជើងនឹងមិនស្រេកឃ្លាន ចំពោះការដកទណ្ឌកម្មឡើយ ប៉ុន្តែនឹងមិនដែលមើលរំលងការញុះញង់ របស់សហរដ្ឋអាមេរិក និងបក្ខពួករបស់ខ្លួនក្នុងការរំលោភ លើអធិបតេយ្យភាពស្របច្បាប់របស់កូរ៉េខាងជើង ក្រោមលេស នៃការអនុវត្តទណ្ឌកម្ម និងប្រឆាំងយ៉ាងម៉ឺងម៉ាត់ ជាមួយនឹងសកម្មភាពម៉ឺងម៉ាត់” ។
មន្ត្រីរូបនេះបានកត់សម្គាល់ថា “ការលើកលែងទណ្ឌកម្ម តាមរយៈការចរចាមិនមែនជាបញ្ហា ដែលគួរឱ្យព្រួយបារម្ភតាំង ពីយូរយារណាស់ មកហើយសម្រាប់កូរ៉េខាងជើង ដែលមិនមានទណ្ឌកម្មដែលត្រូវលុបចោល និងត្រូវបន្ថែមទេ ហើយវាមិនមែននៅក្នុងរបៀប វារៈរបស់កូរ៉េខាងជើងទេ”។
ជាមួយនឹងគំនិតផ្តួចផ្តើមរបស់ទីក្រុងសេអ៊ូល ប្រទេសទាំង ១១ រួមទាំងសហរដ្ឋអាមេរិក និងជប៉ុនបានបង្កើត MSMT កាលពីខែតុលាឆ្នាំមុន ដើម្បីបន្តការត្រួតពិនិត្យ ទណ្ឌកម្មប្រឆាំង នឹងកូរ៉េខាងជើង បន្ទាប់ពីការរំសាយក្រុមត្រួតពិនិត្យ របស់អង្គការសហប្រជាជាតិ កាលពីខែមេសាឆ្នាំ មុនដោយសារតែការវេតូរបស់រុស្ស៊ី ៕
ប្រែសម្រួល ឈូក បូរ៉ា
