ព្រៃវែង៖ ក្នុងឱកាសអញ្ជើញជាអធិបតី ពិធីសម្ពោធសមិទ្ធផលអគារសិក្សា នាថ្ងៃទី២៤ ខែកុម្ភៈ ឆ្នាំ២០២៥ ក្នុងឃុំស្មោងខាងត្បូង ស្រុកកំចាយមារ ខេត្តព្រៃវែង លោកឧបនាយករដ្ឋមន្ត្រី ស សុខា រដ្ឋមន្រ្តីក្រសួងមហាផ្ទៃ បានបង្ហាញក្តីស្ញប់ស្ញែង និងការលើកទឹកចិត្តខ្ពស់ដល់លោក ហាតមុត គីសេកេ (Mr. HARTMUT GIESECKE) និងក្រុមគ្រួសារ រួមទាំងអង្គការដៃគូពាក់ព័ន្ធទាំងអស់ ពិសេសអង្គការកុមារកម្ពុជារីករាយ ដែលបានចូលរួមចំណែកគាំទ្រការអភិវឌ្ឍវិស័យអប់រំកុមារតូចនៅកម្ពុជា។
លោកឧបនាយករដ្ឋមន្ត្រី បានបន្ថែមថា ជាក់ស្តែងតាមរយៈមូលនិធិ គីនចាន់ ដែលមានមូលដ្ឋាននៅប្រទេសស្វីស ក្រោមកិច្ចសហការអនុវត្ត គម្រោងពីអង្គការដៃគូពាក់ព័ន្ធ មានសាលារៀនរហូតដល់អគារសិក្សា កម្រិតមត្តេយ្យសិក្សាចំនួន ៩០ខ្នង និងអគារសម្រាប់កម្រិតបឋមសិក្សា ៩០ខ្នង ត្រូវបានកសាងនិងជួសជុលកែលម្អនៅតាមបណ្តាខេត្ត ចំនួន ៩ ក្នុងនោះ អគារមតេយ្យសិក្សា ២២ខ្នង និងអគារបឋមសិក្សា ៦ខ្នង ដែលត្រូវប្រារព្ធពិធីសម្ពោធនាឱកាសដ៏ឱឡារិកនោះ។
សូមជម្រាបថា សាលាគោលដៅចំនួន ២៩សាលា ក្នុងខេត្តចំនួន៧ លោកតា ហាតមុត គីសេកេ (MR. HARTMUT GIESECKE) តាមរយៈអង្គការកុមារកម្ពុជារីករាយ (HCC) បានជួយសង់សាលារៀននោះ រួមមាន ខេត្តព្រៃវែង៤សាលា ខេត្តត្បូងឃ្មុំ ៤សាលា ខេត្តកំពងចាម ៣សាលា ខេត្តក្រចេះ ៣សាលា ខេត្តស្ទឹងត្រែង ៥សាលា ខេត្តបន្ទាយមានជ័យ ៤សាលា និងខេត្តសៀមរាប ៦សាលា។
លោកឧបនាយករដ្ឋមន្ត្រី បានថ្លែងអំណរគុណចំពោះបេសកម្ម និងទឹកចិត្តប្រកបដោយសប្បុរសរបស់លោកតា ហាតមុត គីសេកេ និងបណ្ដាអង្គការដៃគូ ព្រមទាំងបានគូសបញ្ជាក់ថា រាជរដ្ឋាភិបាល បានដាក់គោលដៅធានាថាប្រជាជានកម្ពុជាទាំងអស់ ទទួលបានការអប់រំ ប្រកបដោយបរិយាបន្ន និងសមធម៌ ជាមួយនឹងចំណេះដឹង ជំនាញ និងគុណតម្លៃ ដែលនាំទៅរកសុខភាពល្អ កាយសម្បទាមាំមួន និងការសិក្សាពេញមួយជីវិត។
យោងតាមរបាយការណ៍ លោក ប៊ិន ជីវ័ន្ត អភិបាល នៃគណៈអភិបាលស្រុកកំចាយមារ ស្រុកនេះ មានគ្រឹះស្ថានសិក្សាមានចំនួន ៥៩កន្លែង ក្នុងនោះមាន មត្តេយ្យសិក្សា៥ កន្លែង សាលាបឋមសិក្សា៤៣ កន្លែង អនុវិទ្យាល័យ ៧កន្លែង វិទ្យាល័យ២កន្លែង វិទ្យាស្ថានអភិវឌ្ឍនសហគមន៍ ១កន្លែង សាកលវិទ្យាល័យ ១កន្លែង។ លោកអះអាងថា សមិទ្ធផលសម្ពោធ នាថ្ងៃនេះ បានធ្វើឱ្យវិស័យអប់រំក្នុងស្រុកកំចាយមារ រីកចម្រើនមួយកម្រិតទៀតទាំងផ្នែកហេដ្ឋារចនាសម្ព័ន្ធ និងគុណភាព៕
