ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ក្រោមម្លប់នៃសុខសន្តិភាព កម្ពុជា មានកលានុវត្តភាព សមត្ថភាព និងលទ្ធភាពគ្រប់គ្រាន់ ដើម្បីបង្កើនល្បឿននៃការអភិវឌ្ឍលើគ្រប់វិស័យ ហើយកត្តាសុខសន្តិភាពនេះ បានបើកឱកាសឱ្យបង្កើតនូវសមទ្ធផលថ្មីៗបន្តទៀត ទាំងវិស័យពុទ្ធចក្រ និងអាណាចក្រ ។
ថ្លែងក្នុងព្រះរាជពិធីស្រោចស្រង់ព្រះសុគន្ធវារី ថ្វាយ ប្រគេន សម្តេចព្រះមហាសង្ឃរាជ សម្តេចព្រះសង្ឃនាយក សម្តេចព្រះសង្ឃនាយករង និងសម្ដេច ទាំង៦ព្រះអង្គ នៅក្នុងវត្តបទុមវតី នាព្រឹកថ្ងៃទី១៤ ខែមីនា ឆ្នាំ២០២៥នេះ សម្តេចធិបតី បានគូសរំលឹកថា ព្រះពុទ្ធសាសនា ជាមរតដូចតាខ្មែរ ហើយការបង្រៀនរបស់ព្រះពុទ្ធ ជាប្រភពនៃសេចក្តី ស្រលាញ់ បញ្ញាញ្ញាណ សន្តិភាពផ្លូវចិត្ត និងបានជ្រួតជ្រាបក្នុងស្មារតី ផ្នត់គំនិតឥរិយាបទ សកម្មភាពរបស់ប្រជាជនខ្មែរ ដែលបង្ហាញឱ្យឃើញច្បាស់ តាមរយៈចរឹករួសរាយរាក់ទាក់ស្មោះត្រង់ សុភាពរៀបសារទនភ្លន់ និងម៉ឺងម៉ាត់ ។
បន្ថែមលើនេះ សម្តេចធិបតី បានគូសបញ្ជាក់ថា ព្រះពុទ្ធសាសនា ជាសាសនារបស់រដ្ឋ ខណៈដែលសេរីភាពខាងជំនឿ និងការប្រតិបត្តិសាសនាដទៃទៀត ក៏ត្រូវបានធានានៅក្នុងលក្ខខណ្ឌដែលមិនប៉ះពាល់ជំនឿ ឬសាសនាដទៃទៀត ។
ក្នុងនោះ សម្តេចធិបតី ហ៊ុន ម៉ាណែត សង្កត់ធ្ងន់ថា ជាក់ស្តែងកម្ពុជា មានសុខដុមរមនាសាសនា និងរក្សាបាននូវតម្លៃសាមគ្គីភាព រវាងជាតិសាសន៍ និងសាសនាផ្សេងៗគ្នា ដោយមិនមានប្រកាន់យកនិន្នាការជ្រុលនិយមនោះទេ ។
សម្តេចនាយករដ្ឋមន្ត្រី បានសង្កត់ធ្ងន់ថា “ក្រោមម្លប់នៃសុខសន្តិភាព កម្ពុជា មានកលានុវត្តភាព សមត្ថភាព និងលទ្ធភាពគ្រប់គ្រាន់ ដើម្បីបង្កើនល្បឿន នៃការអភិវឌ្ឍលើគ្រប់វិស័យ កត្តាសុខសន្តិភាពនេះ ក៏បានផ្តល់ លទ្ធភាព ដល់ពុទ្ធបរិស័ទយើងធ្វើបុណ្យ សន្ទាន តាមសេចក្តីប្រាថ្នា និងបើកឱកាសឱ្យយើង បង្កើតនូវសមទ្ធផលថ្មីៗបន្តទៀត ទាំងវិស័យពុទ្ធចក្រ និងអាណាចក្រ” ។
ក្នុងនោះដែរ សម្តេចធិបតី ហ៊ុន ម៉ាណែត បានសង្ឃឹមថា សម្តេចជាអង្គម្ចាស់គ្រប់ព្រះអង្គ គង់ជាម្លប់ដ៏ត្រជាក់នៃការគោរព ប្រតិបត្តិ នៃព្រះពុទ្ធសាសនា នៅកម្ពុជា ឱ្យបានបន្តរីកចម្រើន និងរុងរឿងជានិច្ច និរន្តរ៍៕
