បរទេស៖ បើយោងតាមតួលេខ ឧស្សាហកម្មផ្លូវការ ដែលបានចេញផ្សាយ កាលពីថ្ងៃអង្គារ បានឱ្យដឹងថា ការលក់របស់ ក្រុមហ៊ុន Tesla នៅអឺរ៉ុបបានធ្លាក់ ចុះក្នុងរយៈពេលពីរខែ ដំបូងនៃឆ្នាំនេះ ។
យោងតាមគេហទំព័រ Business Insider ចេញផ្សាយ កាលពីថ្ងៃទី២៥ ខែមីនា ឆ្នាំ២០២៥ បានឱ្យដឹងថា ក្រុមហ៊ុនផលិត រថយន្តអគ្គិសនី (EV) របស់លោក Elon Musk លក់បានតិច ជាង ២៧.០០០ គ្រឿងក្នុងខែមករា និងកុម្ភៈ បើធៀបនឹងអំឡុង ពេលដូចគ្នាកាលពីឆ្នាំមុនគឺមានចំនួនជាង ៤៦.០០០គ្រឿងដែលលក់បាន ដែលជាការធ្លាក់ចុះ ៤២,៦ភាគរយ។
តួលេខសមាគមក្រុមហ៊ុន ផលិតរថយន្តអឺរ៉ុប គឺគ្របដណ្តប់ សហភាពអឺរ៉ុប ចក្រភពអង់គ្លេស និងបណ្តាប្រទេស នៃសមាគមពាណិជ្ជកម្ម សេរីអឺរ៉ុបនៃអ៊ីស្លង់ លីចតេនស្ទីន ន័រវេស និងស្វីស។
ការធ្លាក់ចុះរបស់ក្រុមហ៊ុន Tesla បានកើតឡើង បើទោះបីជាការលក់រថយន្ត EV កាន់តែទូលំទូលាយកើនឡើង ២៨,៤ភាគរយ ដល់ជាង ២៥៥.០០០គ្រឿង នៅអឺរ៉ុបក្នុងខែមករា និងកុម្ភៈ ដែលស្មើនឹង ១៥ភាគរយ នៃទីផ្សារសហភាព អឺរ៉ុប។ ក្រុមហ៊ុនផលិតផ្សេងទៀតបានបង្ហាញពីការកើនឡើងជារួមជាមួយនឹងការលក់របស់ក្រុមហ៊ុន Volkswagen Group កើនឡើង ៤,៣ភាគរយ និងក្រុមហ៊ុន Renault Group កើនឡើង ៨,២ភាគរយ ។
Tesla បានប្រឈមមុខនឹងការ រិះគន់លើកិច្ចខិតខំប្រឹងប្រែង កាត់បន្ថយការចំណាយដ៏ខ្លាំងក្លារបស់លោក Musk នៅក្រសួង DOGE សេតវិមាន និងការកាត់ក្តីរបស់លោក ចំពោះគណបក្សនយោបាយស្តាំនិយមនៅអឺរ៉ុប ដែលនេះវាបានបង្ក ឱ្យមានការតវ៉ាប្រឆាំង នឹងក្រុមហ៊ុនផលិតរថយន្ត EV របស់លោក បណ្តាលឱ្យមានករណីបំផ្លិចបំផ្លាញ និងអំពាវនាវឱ្យធ្វើពហិការ ជាមួយរថយន្ត Tesla ៕
ប្រែប្រួលៈ ណៃ តុលា
