រដ្ឋាភិបាលកូរ៉េខាងត្បូង នឹងបង្កើតវិធានការគាំទ្រ សម្រាប់ឧស្សាហកម្មបន្ទះឈីប ក្នុងការឆ្លើយតប នឹងពន្ធរបស់អាមេរិក

សេអ៊ូលៈ រដ្ឋមន្ត្រីក្រសួងឧស្សាហកម្ម បានឲ្យដឹងថា រដ្ឋាភិបាលនឹងបង្កើតវិធានការ គាំទ្រយ៉ាងឆាប់រហ័ស សម្រាប់ឧស្សាហកម្មបន្ទះឈីប ក្នុងស្រុក ដើម្បីទប់ទល់នឹងផលប៉ះពាល់ នៃពន្ធ ដែលបានគ្រោងទុក របស់សហរដ្ឋអាមេរិក លើការនាំចូល semiconductor នេះបើយោងតាមការចុះផ្សាយរបស់ទីភ្នាក់ងារ សារព័ត៌មានយុនហាប់។

រដ្ឋមន្ត្រីក្រសួងឧស្សាហកម្មលោក Ahn Duk-geun បានឲ្យដឹងថា វិធានការរបស់រដ្ឋាភិបាល នឹងត្រូវបានប្រកាស ក្នុងពេលដ៏ខ្លីខាងមុខ ខណៈជួបជាមួយមន្ត្រីមក ពីក្រុមហ៊ុនផលិតបន្ទះឈីបក្នុងស្រុក ដើម្បីពិភាក្សាអំពីយុទ្ធសាស្ត្រ ឆ្លើយតបប្រឆាំងនឹងពន្ធគយរបស់សហរដ្ឋអាមេរិក ដែលបានគ្រោងទុក ។ ប្រធានាធិបតីសហរដ្ឋអាមេរិកលោក ដូណាល់ ត្រាំ បានព្រមានអំពីពន្ធលើការនាំចូល semiconductor ចាប់តាំងពីចូលកាន់ តំណែងក្នុងខែមករា ហើយបានអះអាងឡើងវិញ នូវផែនការកាល ពីសប្តាហ៍មុន ដោយថាពួកគេនឹងចាប់ផ្តើម “ឆាប់ៗនេះទេ” ។

នៅក្នុងកិច្ចប្រជុំកាលពីថ្ងៃព្រហស្បតិ៍ មន្ត្រីឧស្សាហកម្ម semiconductor បានអំពាវនាវឱ្យរដ្ឋាភិបាលធ្វើការ ចរចាយ៉ាងសកម្មជា មួយសហរដ្ឋអាមេរិក និងបង្កើតវិធានការគាំទ្រ ដើម្បីកាត់បន្ថយផលប៉ះពាល់ នៃពន្ធលើអាជីវកម្ម ក្នុងស្រុក នេះបើយោងតាមក្រសួងពាណិជ្ជកម្ម ឧស្សាហកម្ម និងថាមពលរបស់ប្រទេស កូរ៉េខាងត្បូង។

មន្ត្រីធុរកិច្ចបានកត់សម្គាល់ថា ពន្ធដែលបានស្នើឡើង អាចមានផលប៉ះពាល់តិចតួចលើឧស្សាហកម្មបន្ទះឈីបក្នុងស្រុក ដោយចង្អុលទៅសហរដ្ឋអាមេរិក’ សមត្ថភាពផលិតមានកម្រិត និងចំណែកទីផ្សារ សកលខ្ពស់របស់កូរ៉េខាងត្បូង ជាពិសេសផលិតផលដែលមានតម្លៃខ្ពស់ ដូចជាអង្គចងចាំកម្រិតបញ្ជូនខ្ពស់ ។ យោងតាមក្រសួងបានឱ្យដឹងថា ពួកគេនៅតែសម្តែងការ ព្រួយបារម្ភយ៉ាងខ្លាំង ចំពោះភាពមិនច្បាស់លាស់ ដែលកំពុងកើនឡើង នៅក្នុងទីផ្សារពាណិជ្ជកម្ម ពិភពលោក ដែលអាចប៉ះពាល់យ៉ាងធ្ងន់ធ្ងរ ដល់ឧស្សាហកម្ម ក្នុងស្រុក ក៏ដូចជាសេដ្ឋកិច្ច៕
ប្រែសម្រួល ឈូក បូរ៉ា