បរទេស៖ ប៉ូលីស Merseyside នៃចក្រភពអង់គ្លេស បាននិយាយថា ការបើកឡានបុកហ្វូងអ្នកគាំទ្របាល់ទាត់ក្នុងទីក្រុង Liverpool កាលពីថ្ងៃច័ន្ទ ដែលបានបណ្តាលឲ្យ មនុស្សយ៉ាងតិច ៤៧នាក់រងរបួស ទំនងជាមិនមែនជាការ វាយប្រហារភេរវកម្មទេ។
យោងតាមសារព័ត៌មាន RT ចេញផ្សាយនៅថ្ងៃទី២៦ ខែឧសភា ឆ្នាំ២០២៥ បានឱ្យដឹងថា រថយន្តនេះបានបើកឆ្លង កាត់ក្បួនដង្ហែរជ័យជំនះ Premier League របស់ក្លឹបបាល់ទាត់ Liverpool នៅកណ្តាល Water Street ។ ប៉ូលីសបាននិយាយថា អ្នកបើកបរជាបុរសជនជាតិអង់គ្លេសអាយុ ៥៣ ឆ្នាំ មកពីតំបន់ Liverpool ត្រូវបានឃាត់ខ្លួន។
លោក Jenny Sims អគ្គស្នងការរងបណ្តោះអាសន្ន បានប្រាប់អ្នកយកព័ត៌មាន ក្នុងសន្និសីទសារព័ត៌មាន មួយកាលពីល្ងាចថ្ងៃចន្ទថា “វាមានសារៈសំខាន់ណាស់ដែលគេមិនត្រូវប៉ាន់ស្មាន ឬផ្សព្វផ្សាយព័ត៌មានខុស នៅលើប្រព័ន្ធផ្សព្វផ្សាយសង្គម” ។
លោក Sims បាននិយាយថា “យើងជឿថានេះជា ឧបទ្ទវហេតុដាច់ដោយឡែកមួយ ហើយបច្ចុប្បន្នយើងមិនកំពុង ស្វែងរកនរណាម្នាក់ផ្សេងទៀតទាក់ទងនឹងឧប្បត្តិហេតុនេះទេ។ ឧប្បត្តិហេតុនេះមិនត្រូវបានចាត់ទុកជាអំពើភេរវកម្មទេ”។
យោងតាមសេវាសង្គ្រោះបន្ទាន់ក្នុងតំបន់ គឺមានមនុស្ស ២០ នាក់ ត្រូវបានព្យាបាលនៅកន្លែងកើតហេតុ និង ២៧ នាក់ទៀតកំពុងសម្រាកនៅមន្ទីរពេទ្យក្នុងនោះមាន ២ នាក់រងរបួសធ្ងន់ធ្ងរ ហើយក៏មានកុមារ៤នាក់ ស្ថិតក្នុងចំណោមជនរងគ្រោះផងដែរ។
នាយករដ្ឋមន្ត្រី អង់គ្លេស លោក Keir Starmer បានសរសើរប៉ូលីស និងសេវាសង្គ្រោះបន្ទាន់ចំពោះ “ភាពក្លាហានដ៏អស្ចារ្យ” របស់ពួកគេ៕
