ភ្នំពេញ៖ លោក Tull TRAISORAT ឯកអគ្គរាជទូតថៃប្រចាំកម្ពុជា ចង់ឱ្យមានការបង្កើន នៃជើងហោះហើរត្រង់បន្ថែមទៀត ពីតំបន់ផ្សេងៗ ដែលមិនទាន់មានការភ្ជាប់ជើងហោះហើរត្រង់ជាមួយគ្នា ដូចជាតំបន់កោះសំខាន់ៗរបស់ប្រទេសថៃ មកកាន់កម្ពុជា ។
ការបង្ហាញនូវក្តីរំពឹង និងចង់ឱ្យមានការបង្កើនជើងហោះហើរត្រង់ខាងលើនេះ ត្រូវបានលើកឡើង ក្នុងឱកាសអញ្ជើញទស្សនកិច្ច លើវឌ្ឍនភាពនៃការសាងសង់ អាកាសយានដ្ឋានអន្តរជាតិតេជោ ខេត្តកណ្តាល នាថ្ងៃទី៤ ខែមិថុនា ឆ្នាំ២០២៥នេះ ។ ដោយក្នុងនោះលោកឯកអគ្គរាជទូត បានបញ្ជាក់ថា នេះគឺជាលើកទី១ ដែលបានអញ្ជើញមកដល់ អាកាសយានដ្ឋានអន្តរជាតិតេជោ ក្នុងអំឡុងពេលដែលកំពុងដំណើរការសាងសង និងកំពុងសម្រេចការសាងសង់ បានប្រមាណជាង៩០ និងត្រៀមនឹងបើកដំណើរ ការនៅខែកញ្ញាខាងមុខ ។
ថ្លែងក្នុងឱកាសនោះ លោកឯកអគ្គរាជទូត ក៏បានបង្ហាញនូវក្តីរំភើប និងចូលរួមត្រេកអរ ជាមួយនឹងអ្វីដែលកម្ពុជា កំពុងសម្រេចបាន ដែលជាសមទ្ធផលដ៏អស្ចារ្យ និងប្រវត្តិសាស្ត្រថ្មីមួយ របស់កម្ពុជា ។ ដោយឡែកលោក ក៏បានកត់សម្គាល់ផងដែរ អំពីរចនាបទអាកាសយានដ្ឋានអន្តរជាតិតេជោរបស់ខ្មែរ និងចាប់អារម្មណ៍ជាខ្លាំង ទៅលើរចនាសម្ព័ន្ធជារួម របស់អាកាសយានដ្ឋានថ្មីនេះតែម្តង ដែលលោកទូត បានជឿជាក់ថា នឹងបង្កលក្ខណៈកាន់តែងាយស្រួល ដល់ការធ្វើដំណើររបស់ភ្ញៀវជាតិ និងអន្តរជាតិ នៅពេលអាកាសយានដ្ឋានថ្មីនេះបើកដំណើរការ ។
ជាមួយគ្នានេះ លោកឯកអគ្គរាជទូត បានសម្តែងនូវការអបអរសាទរ ចំពោះរាជរដ្ឋាភិបាលកម្ពុជា ក្នុងការសម្រេចបាននូវសមទ្ធផល ដូចជាអាកាសយានដ្ឋានអន្តរជាតិតេជោនេះឡើង ។
បន្ថែមលើនេះ លោកទូត ក៏បានបញ្ជាក់នូវគោលបំណងសំខាន់របស់លោក ក្នុងដំណើរទស្សនកិច្ចនាឱកាសនេះ គឺជាឱកាសមួយក្នុងការស្វែងរកការវិនិយោគ និងកិច្ចសហការគ្នាណាមួយ រវាងក្រុមហ៊ុនពីប្រទេសថៃ ជាមួយក្រុមហ៊ុនក្នុងស្រុកនៃប្រទេសកម្ពុជា ជាពិសេសកិច្ចសហប្រត្តិបត្តការណាមួយ ជាមួយអាកាសយានដ្ឋានអន្តរជាតិតេជោតែម្តង ពោលទៅលើអាជីវកម្មចំណីអាហារ និងភេសជ្ជៈជាដើម ។
លោក Tull TRAISORAT បានបញ្ជាក់ថា ក្នុងឆ្នាំនេះ គឺជាឆ្នាំទី៧៥ នៃការបង្កើតទំនាក់ទំនងការទូត រវាងប្រទេសថៃនិងកម្ពុជា ដូច្នេះហើយលោកឯកអគ្គរាជទូត បានបង្ហាញនូវក្តីរំពឹង និងចង់ឱ្យមានការបង្កើន នៃជើងហោះហើរត្រង់បន្ថែមទៀត ពីតំបន់ផ្សេងៗ ដែលមិនទាន់មានការភ្ជាប់ជើងហោះហើរត្រង់ជាមួយគ្នា ដូចជាតំបន់កោះសំខាន់ៗ របស់ប្រទេសថៃ មកកាន់កម្ពុជា ។ ដោយការបង្កើនជើងហោះហើរត្រង់ រវាងប្រទេសទាំងពីរ នឹងអាចជាផ្នែកមួយ ក្នុងការជំរុញដល់ការវិនិយោគ ពាណិជ្ជកម្ម ជាពិសេសគឺវិស័យទេសចរណ៍ នៃប្រទេសទាំងពីរ កាន់តែប្រសើរថែមមួយកម្រិតទៀត។
សូមបញ្ជាក់ថា អាកាសយានដ្ឋានអន្តរជាតិតេជោ បានសាងសង់លើផ្ទៃដីសរុប ២,៦០០ហិកតា ស្ថិតនៅចម្ងាយ ១៩គីឡូម៉ែត្រ ពីរាជធានីភ្នំពេញ។ វាត្រូវបានចាត់ថ្នាក់ ជាអាកាសយានដ្ឋាន 4F ហើយត្រូវបានអភិវឌ្ឍជា ៣ដំណាក់កាល។ ថវិកាវិនិយោគសម្រាប់ដំណាក់កាលទី១ គឺ ១៥០០លានដុល្លារ ដោយមិនរាប់បញ្ចូលដីព្រលានយន្តហោះ។ អាកាសយានដ្ឋានអន្តរជាតិតេជោ ជាប្រភេទ 4F គឺប្រភេទព្រលានយន្តហោះធំ ដែលអាចនឹងស្រូបយក និងទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្តហោះធុនយក្ស រហូតដល់ Airbus A380-800 និង យន្តហោះ Boeing 747-800 ចុះចតបាន និងត្រៀមបើកដំណើរការនៅចន្លោះខែកញ្ញាឆ្នាំ២០២៥ខាងមុខនេះ៕
