បរទេស៖ កប៉ាល់ដឹកទំនិញដែលបានឆេះ នៅឆ្នេរសមុទ្រអាឡាស្កាបានលិច ក្នុងមហាសមុទ្រប៉ាស៊ីហ្វិក កាលពីថ្ងៃច័ន្ទបន្ទាប់ពីបានឆេះ អស់រយៈពេល ៣ សប្តាហ៍ ដោយបានលិចជាមួយនឹង រថយន្តរាប់ពាន់គ្រឿង ដែលនៅលើកប៉ាល់នោះ។
យោងតាមសារព័ត៌មាន The News York Times ចេញផ្សាយនៅថ្ងៃទី២៥ ខែមិថុនា ឆ្នាំ២០២៥ បានឱ្យដឹងថា នាវា Morning Midas បានលិចក្នុងចម្ងាយ ៣៦០ម៉ាយពីដី បន្ទាប់ពីការខូចខាតទាំងភ្លើង និងអាកាសធាតុធ្ងន់ធ្ងរ នេះបើយោងតាមសេចក្តីថ្លែងការណ៍ពី Zodiac Maritime ដែលជាអ្នកគ្រប់គ្រងកប៉ាល់។ ក្រុមហ៊ុនបាននិយាយថា គ្មានទំនិញណាមួយត្រូវបានជួយសង្គ្រោះបាននោះទេ មុនពេលដែលកប៉ាល់នោះលិច។
យោងតាមឆ្មាំឆ្នេរសមុទ្រអាមេរិក បានឱ្យដឹងថា កប៉ាល់ប្រវែង ៦០០ ហ្វីតនេះ បានដឹករថយន្តអគ្គិសនី ៧០ គ្រឿង, រថយន្ត hybrids ៦៨១ គ្រឿង និងរថយន្តធម្មតាជាង ២.០០០ គ្រឿង។ កប៉ាល់នេះ ក៏មានប្រេងឥន្ធនៈជាង ១.៨០០ តោននៅលើនាវាផងដែរ ដែលបង្កើតសក្តានុពល សម្រាប់ការលេចធ្លាយប្រេង។
ឆ្មាំសមុទ្របាននិយាយនៅក្នុងសេចក្តីថ្លែងការណ៍មួយថា មិនមានសញ្ញាដែលអាចមើល ឃើញនៃការបំពុលទេ គិតត្រឹមថ្ងៃអង្គារ។ Zodiac Maritime បាននិយាយថា ទូកសង្គ្រោះពីរនៅតែស្ថិតនៅក្បែរកន្លែងដែលកប៉ាល់លិច ដើម្បីតាមដានការបំពុល ឬកំទេចកំទី ដោយមាននាវាមួយទៀតកំពុងធ្វើដំណើរដើម្បីការពារបរិស្ថានសមុទ្រ។
សមាជិកនាវិកទាំងអស់ ២២ នាក់នៅលើនាវា Morning Midas បានជម្លៀសខ្លួន តាមទូកសង្គ្រោះ ហើយត្រូវបានជួយសង្គ្រោះដោយកប៉ាល់ពាណិជ្ជកម្មមួយផ្សេងទៀតភ្លាមៗ បន្ទាប់ពីអគ្គីភ័យបានឆាបឆេះកាលពីថ្ងៃទី ៣ ខែមិថុនា នៅពេលដែលវាមានចម្ងាយប្រហែល ១.២០០ ម៉ាយពីដែនដីទីក្រុង Anchorage ។
កប៉ាល់នោះបានធ្វើដំណើរ ពីប្រទេសចិន ទៅម៉ិកស៊ិក។ Zodiac Maritime បាននិយាយថា ផ្សែងបានចាប់ផ្តើម ហុយចេញពីនាវា ដែលផ្ទុក យានជំនិះអគ្គិសនី ហើយក្រុមនាវិកបានផ្ញើការជូនដំណឹង អំពីទុក្ខព្រួយនៅពេល ដែលពួកគេមិនអាចទប់ទល់ នឹងភ្លើងឆាបឆេះ ៕
