បរទេស៖ ជនជាតិចិនម្នាក់ ដែលបានបាត់ខ្លួន ក្នុងប្រទេសថៃ បន្ទាប់ពីទទួលយកការងារថតស្ពត ត្រូវបានជួយ សង្គ្រោះហើយ នេះបើតាមស្ថានទូតចិន ប្រចាំទីក្រុងបាងកក ដែលបានព្រមានពលរដ្ឋចិន កុំឲ្យទទួលយកការផ្តល់ការងារ ដោយសាមញ្ញ។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី៤ ខែកក្កដា ឆ្នាំ២០២៥ បានឱ្យដឹងថា ស្ថានទូតចិន បាននិយាយនៅក្នុង សេចក្តីថ្លែងការណ៍មួយថា ការជួយសង្គ្រោះមនុស្សម្នាក់ដែលមាននាមត្រកូល Zhong គឺជាកិច្ចខិតខំប្រឹងប្រែងរួមគ្នារបស់ភាគីផ្សេងៗ ប៉ុន្តែមិនបានបញ្ចេញព័ត៌មានលម្អិតនោះទេ។ ស្ថានទូតមិនបានប្រាប់ឈ្មោះពេញ ឬបង្ហាញភេទ របស់ជនរងគ្រោះនោះទេ។
ប្រព័ន្ធផ្សព្វផ្សាយក្នុងស្រុកដែលគាំទ្រដោយរដ្ឋរបស់ប្រទេសចិនបានរាយការណ៍នៅថ្ងៃសុក្រថា បុរសជនជាតិចិនអាយុ ២៣ ឆ្នាំម្នាក់ដែលមាននាមត្រកូល Zhong ត្រូវបានបោកបញ្ឆោតនិងជួញដូរ ទៅប្រទេសមីយ៉ាន់ម៉ាបន្ទាប់ពីបានមកដល់ប្រទេសថៃ សម្រាប់ការងារថតរូប ដាក់គម្របទស្សនាវដ្តី កាលពីដើមខែមិថុនា។
ទូរទស្សន៍រដ្ឋចិន CCTV បានផ្សាយថា ប្អូនស្រីរបស់គាត់ ដែលបានទទួលការហៅទូរស័ព្ទ គួរឱ្យសង្ស័យពីគាត់កាលពីសប្តាហ៍មុន នៅពេលដែលគាត់ ស្ថិតនៅក្នុងទីតាំងមិនស្គាល់មួយក្នុងប្រទេសមីយ៉ាន់ម៉ា បានរាយការណ៍ថា គាត់បាត់ខ្លួនទៅប៉ូលីស នៅទីក្រុងក្វាងចូវ និងទីក្រុងបាងកក។
ស្ថានទូតនៅទីក្រុងបាងកកបានព្រមានពលរដ្ឋចិនឱ្យមានការប្រុងប្រយ័ត្នចំពោះ “ការងារដែលមានប្រាក់ខែខ្ពស់” គួរឱ្យសង្ស័យនៅបរទេស ដោយបញ្ជាក់ច្បាស់ថា ប្រទេសថៃទាមទារឱ្យជនបរទេស ទទួលបានលិខិតអនុញ្ញាតសមរម្យ ដើម្បីធ្វើការនៅទីនោះ។
ការព្រមាននេះកើតឡើង ខណៈដែលការព្រួយបារម្ភអំពីការ ជួញដូរមនុស្ស និងគម្រោងការក្លែងបន្លំការងារ ដែលផ្តោតលើជនជាតិចិន នៅបរទេសកើនឡើង ៕
