តូក្យូ៖ ប្រភពដែលដឹង អំពីបញ្ហានេះបានឲ្យដឹងថា ក្រុមហ៊ុន Nissan Motor Co. កំពុងស្វែងរកភាពជាដៃគូជាមួយក្រុមហ៊ុនអេឡិចត្រូនិកយក្សតៃវ៉ាន់ Foxconn ក្នុងវិស័យរថយន្តអគ្គិសនី។
ប្រភពបានបន្ថែមថា ផែនការដែលកំពុងពិចារណា នឹងពាក់ព័ន្ធនឹងការផលិតរថយន្ត EVs របស់ក្រុមហ៊ុន Foxconn នៅរោងចក្រ signature Oppama របស់ក្រុមហ៊ុន Nissan នៅជិតទីក្រុងតូក្យូ ដែលពីមុនត្រូវបានសម្លឹងមើលការបិទរោងចក្រ។
ប្រសិនបើបានសម្រេច កិច្ចព្រមព្រៀងនេះ ត្រូវបានគេរំពឹងថានឹងរក្សារោងចក្រ Oppama ឱ្យដំណើរការដោយបញ្ច្រាសផែនការបិទពីមុនមក ដែលជំរុញដោយការលំបាកផ្នែកហិរញ្ញវត្ថុរបស់ក្រុមហ៊ុន Nissan។ ភាពជាដៃគូនេះ ក៏អាចផ្តល់សន្ទុះដល់កិច្ចខិតខំប្រឹងប្រែងរៀបចំរចនាសម្ព័ន្ធឡើងវិញ ដែលកំពុងបន្តរបស់ក្រុមហ៊ុនផងដែរ។
ក្រុមហ៊ុន Foxconn បាននឹងកំពុងពន្លឿនប្រតិបត្តិការ EV របស់ខ្លួន ដោយបានយល់ព្រមរួចហើយក្នុងការផ្គត់ផ្គង់រថយន្ត EV ដល់ក្រុមហ៊ុន Mitsubishi Motors Corp។ ក្រុមហ៊ុននេះក៏កំពុងពិភាក្សាជាមួយក្រុមហ៊ុន Mitsubishi Fuso Truck និង Bus Corp. ជុំវិញការផ្តល់រថយន្តក្រុងអគ្គិសនីផងដែរ។
ប្រភពដដែលបានឲ្យដឹងថា ក្រុមហ៊ុនតៃវ៉ាន់ ចាត់ទុកការចងសម្ព័ន្ធមេត្រីភាពជាមួយក្រុមហ៊ុន Nissan ថាជាកាតាលីករដ៏មានសក្តានុពល ក្នុងការពង្រីកការបោះជំហានរបស់ខ្លួន នៅក្នុងទីផ្សារប្រទេសជប៉ុន។ រោងចក្រ Oppama ដ៏សំខាន់របស់ក្រុមហ៊ុន Nissan នៅទីក្រុង Yokosuka ខេត្ត Kanagawa គឺជាកន្លែងដែលក្រុមហ៊ុន បានត្រួសត្រាយការផលិតរថយន្ត EV៕
ប្រែសម្រួល ឈូក បូរ៉ា
