យន្តហោះដឹកទំនិញ រអិលចេញពីផ្លូវរត់នៅហុងកុង បុកជាមួយរថយន្តល្បាតសន្តិសុខ ធ្លាក់ទាំងពីរចូលទៅក្នុងសមុទ្រ បណ្តាលឱ្យស្លាប់មនុស្សពីរនាក់
បរទេស៖ អាជ្ញាធរបាននិយាយថា យន្តហោះដឹកទំនិញមួយគ្រឿង បានរអិលចេញពីផ្លូវរត់របស់ហុងកុង ហើយបានបុកជាមួយរថយន្តល្បាតសន្តិសុខ មុនពេលដែលទាំងយន្តហោះ និងរថយន្តល្បាតបានធ្លាក់ចូលទៅក្នុងសមុទ្រ កាលពីព្រឹកថ្ងៃចន្ទនេះ ដោយបានសម្លាប់មនុស្សពីរនាក់នៅក្នុងរថយន្ត ចំណែក សមាជិកនាវិកទាំងបួននាក់ នៅលើយន្តហោះមិនមានរបួសនោះទេ ។
យោងតាមសារព័ត៌មាន AP ចេញផ្សាយនៅថ្ងៃទី២០ ខែតុលា ឆ្នាំ២០២៥ បានឱ្យដឹងថា យន្តហោះ Boeing 747 ហោះហើរដោយក្រុមហ៊ុនអាកាសចរណ៍ ACT ដែលមានមូលដ្ឋាននៅប្រទេសតួកគី បានចុះចតនៅអាកាសយានដ្ឋានអន្តរជាតិហុងកុងនៅម៉ោងប្រហែល ៣៖៥០នាទី ទៀបភ្លឺ ពីទីក្រុងឌូបៃ ប្រទេសអារ៉ាប់រួម ។ យន្តហោះនេះកំពុងដំណើរការក្រោមការ ជួលដោយក្រុមហ៊ុន Emirates ដែលជាក្រុមហ៊ុនដឹកជញ្ជូនផ្លូវឆ្ងាយ ដែលមានមូលដ្ឋាននៅទីក្រុងឌូបៃ ។
លោក Steven Yiu នាយកប្រតិបត្តិ នៃអាជ្ញាធរអាកាសយានដ្ឋាន ក្នុងប្រតិបត្តិការអាកាសយានដ្ឋានបាននិយាយក្នុងសន្និសីទសារព័ត៌មានមួយថា captains មិនបានស្វែងរកជំនួយមុនពេលចុះចតទេ ហើយបានបើកយឺតៗ នៅពាក់កណ្តាលផ្លូវរត់ មុនពេលរអិលទៅខាងឆ្វេង។
លោកបានបន្តថា៖ «រថយន្តល្បាតមិនបានបើកលឿនឡើងលើផ្លូវរត់ទេ គឺយន្តហោះដែលចុះពីផ្លូវរត់ ហើយបានបុករថយន្តល្បាតនៅខាងក្រៅរបង»។
លោក Yiu Men-yeung មន្ត្រីសេវាពន្លត់អគ្គីភ័យបាននិយាយថា នៅពេលដែលក្រុមជួយសង្គ្រោះមកដល់ យន្តហោះបានបាក់ជាពីរផ្នែក អណ្តែតក្នុងសមុទ្រ ហើយសមាជិកនាវិកទាំង ៤ នាក់កំពុងរង់ចាំការជួយសង្គ្រោះនៅទ្វារដែលបានបើកចំហរ៕
ប្រែសម្រួលៈ ណៃ តុលា
