អ៊ីស្រាអែល រំពឹង អាមេរិក នឹងការពារគុណសម្បត្តិ យោធា របស់ខ្លួន ក្នុងចំណោមកិច្ចព្រមព្រៀង F-35 របស់អារ៉ាប៊ីសាអូឌីត
យេរូសាឡឹម៖ អ្នកនាំពាក្យការិយាល័យ នាយករដ្ឋមន្ត្រីបានឲ្យដឹងថា អ៊ីស្រាអែល រំពឹងថាទីក្រុងវ៉ាស៊ីនតោន នឹងរក្សាការចូលប្រើប្រាស់ អាវុធទំនើបៗ របស់សហរដ្ឋអាមេរិក ដោយធ្វើអត្ថាធិប្បាយលើផែនការរបស់សហរដ្ឋអាមេរិកក្នុងការលក់យន្តហោះចម្បាំង F-35 ទៅឱ្យអារ៉ាប៊ីសាអូឌីត។
បច្ចុប្បន្នអ៊ីស្រាអែល គឺជាប្រទេសតែមួយគត់ នៅមជ្ឈិមបូព៌ា ដែលកំពុងប្រតិបត្តិការយន្តហោះបំបាំងកាយទំនើប ហើយច្បាប់របស់សហរដ្ឋអាមេរិក តម្រូវឱ្យការលក់អាវុធណាមួយនៅក្នុងតំបន់មិនធ្វើឱ្យខូច “គុណសម្បត្តិយោធា” របស់អ៊ីស្រាអែលលើប្រទេសជិតខាងរបស់ខ្លួនឡើយ។ អ្នកនាំពាក្យលោកស្រី Shosh Bedrosian បានប្រាប់អ្នកយកព័ត៌មានថា “សហរដ្ឋអាមេរិក និងអ៊ីស្រាអែល មានការយោគយល់គ្នាយូរអង្វែង ដែលអ៊ីស្រាអែល រក្សាគុណសម្បត្តិ នៅពេលនិយាយអំពីការការពាររបស់ខ្លួន”។
លោកស្រីបានបន្ថែមថា “នោះជាការពិតកាលពីម្សិលមិញ នោះជាការពិតនៅថ្ងៃនេះ ហើយនាយករដ្ឋមន្រ្តីលោក បេនចាមីន ណេតាន់យ៉ាហ៊ូ ជឿជាក់ថាវានឹងជាការពិតនៅថ្ងៃស្អែក និងនាពេលអនាគត” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ការកត់សម្គាល់ទាំងនេះ គឺជាមតិយោបល់ផ្លូវការលើកដំបូងពីរដ្ឋាភិបាលអ៊ីស្រាអែល លើផែនការលក់ ដែលបានប្រកាសកាលពីថ្ងៃចន្ទ ដោយប្រធានាធិបតីអាមេរិកលោក ដូណាល់ ត្រាំ ក្នុងអំឡុងពេលកិច្ចប្រជុំនៅសេតវិមានជាមួយព្រះអង្គម្ចាស់រាជទាយាទអារ៉ាប៊ីសាអូឌីត ម៉ូហាម៉េដ ប៊ីន សាល់ម៉ាន់ អាល់ សូដ។ កិច្ចព្រមព្រៀងដែលបានស្នើឡើងនេះ ពាក់ព័ន្ធនឹងយន្តហោះ F-35 រហូតដល់ ៤៨ គ្រឿង ដែលជាការផ្លាស់ប្តូរមួយ បន្ទាប់ពីមានការស្ទាក់ស្ទើរអស់រយៈពេលជាច្រើនឆ្នាំរបស់សហរដ្ឋអាមេរិក ក្រោមរដ្ឋបាលមុនៗ។
អ៊ីស្រាអែល និង អារ៉ាប៊ីសាអូឌីត មិនទាន់បានបង្កើតទំនាក់ទំនង ការទូតជាផ្លូវការនៅឡើយទេ។ ក្នុងអំឡុងពេល នៃដំណើរទស្សនកិច្ច របស់ព្រះអង្គទៅកាន់ទីក្រុងវ៉ាស៊ីនតោន ព្រះអង្គម្ចាស់រាជទាយាទ អារ៉ាប៊ីសាអូឌីត បានមានប្រសាសន៍ថា ព្រះរាជាណាចក្រ របស់ព្រះអង្គចង់ធ្វើឱ្យទំនាក់ទំនង ជាមួយអ៊ីស្រាអែល មានលក្ខណៈធម្មតាឡើងវិញ ប៉ុន្តែចង់ធានា “ផ្លូវច្បាស់លាស់មួយឆ្ពោះទៅរកដំណោះស្រាយរដ្ឋពីរ” ដែលរួមបញ្ចូលទាំងរដ្ឋប៉ាឡេស្ទីនផងដែរ ៕
