យន្តហោះចម្បាំងរបស់ឥណ្ឌា ធ្លាក់ក្នុងអំឡុង ពេលដាក់តាំងបង្ហាញ នៅឯពិព័រណ៍អាកាសចរណ៍ ទីក្រុងឌូបៃ ស្លាប់ពិឡុតម្នាក់
បរទេស៖ ទីភ្នាក់ងារសារព័ត៌មានបានរាយការណ៍ថា យន្តហោះចម្បាំងដែលផលិត ដោយប្រទេសឥណ្ឌាបានធ្លាក់ ក្នុងអំឡុងពេលដាក់តាំងបង្ហាញ នៅឯពិព័រណ៍អាកាសចរណ៍ ទីក្រុងឌូបៃកាលពីថ្ងៃសុក្រ។
យោងតាមសារព័ត៌មាន DW ចេញផ្សាយនៅថ្ងៃទី២១ ខែវិច្ឆិកា ឆ្នាំ២០២៥ បានឱ្យដឹងថា អាជ្ញាធរនៅទីក្រុងឌូបៃ បាននិយាយថា ក្រុមសង្គ្រោះបន្ទាន់បានទៅដល់កន្លែង ហើយអ្នកពន្លត់អគ្គីភ័យកំពុងប្រយុទ្ធនឹងភ្លើង។
គ្រោះថ្នាក់នេះបានកើតឡើងកាលពីវេលាម៉ោង២និង១០នាទីរសៀល ។ (1010 GMT) បន្ទាប់ពីយន្តហោះបានហោះក្នុងរយៈកម្ពស់ទាប ហើយក៏បានធ្លាក់ឆាបឆេះអណ្តាតភ្លើងប្រហែល ១ ម៉ាយ (១,៦ គីឡូម៉ែត្រ) ពីកន្លែងតាំងបង្ហាញ។
ហ្វូងមនុស្សបានប្រមូលផ្តុំគ្នា ដើម្បីមើលការ សម្ដែងតាមអាកាសនៅអាកាសយានដ្ឋានអន្តរជាតិ Al Maktoum នៅ Dubai World Central ក្នុងប្រទេសអារ៉ាប់រួម ។
សារព័ត៌មាន Associated Press បានរាយការណ៍ថា យន្តហោះបានហោះកាត់កន្លែង ដាក់តាំងបង្ហាញជាច្រើនដង មុនពេលដែលវាហាក់ដូចជាបាត់បង់ ការគ្រប់គ្រង និងធ្លាក់បុកនឹងដី។ អ្នកបើកយន្តហោះត្រូវបានស្លាប់ក្នុងឧប្បតិហេតុនោះ ៕
ប្រែសម្រួលៈ ណៃ តុលា
