មេដឹកនាំកំពូលអ៊ីរ៉ង់ បញ្ជាក់ថា គ្មានសារណាមួយ ត្រូវបានផ្ញើទៅ សហរដ្ឋអាមេរិក តាមរយៈប្រទេសទីបីឡើយ
តេអេរ៉ង់ ៖ មេដឹកនាំកំពូលអ៊ីរ៉ង់ លោក អាលី ខាមេនី បានច្រានចោលថា ជា «ពាក្យចចាមអារ៉ាមប្រឌិត» ចំពោះការអះអាងថ្មីៗនេះថា ទីក្រុងតេអេរ៉ង់ បានផ្ញើសារ ទៅសហរដ្ឋអាមេរិក តាមរយៈប្រទេសទីបី នេះបើយោង តាមការចុះផ្សាយ របស់ទីភ្នាក់ងារសារព័ត៌មាន ចិនស៊ិនហួ។
ថ្លែងនៅក្នុងសុន្ទរកថា តាមទូរទស្សន៍ ដែលបានចាក់ផ្សាយ កាលពីយប់ថ្ងៃព្រហស្បតិ៍ លោកហាក់ ដូចជាបដិសេធ របាយការណ៍ ប្រព័ន្ធផ្សព្វផ្សាយ លោកខាងលិច ដែលបង្ហាញថា សារមួយដែលបានផ្ញើ កាលពីដើមខែនេះ ដោយប្រធានាធិបតីអ៊ីរ៉ង់ លោក ម៉ាស៊ូដ ប៉េហ្សេសគីយ៉ាន ទៅកាន់ព្រះអង្គម្ចាស់រាជទាយាទអារ៉ាប៊ីសាអូឌីត ម៉ូហាម៉េដ ប៊ីន សាលម៉ាន អាល់សូដ មុនពេលដំណើរទស្សនកិច្ច នៅសហរដ្ឋអាមេរិករបស់លោក ខាមេនី បានឲ្យដឹងថា «ពួកគេប្រឌិតពាក្យ ចចាមអារ៉ាមដែលអះអាងថា រដ្ឋាភិបាលអ៊ីរ៉ង់ បានផ្ញើសារទៅសហរដ្ឋអាមេរិក តាមរយៈប្រទេសណាមួយ ដែលជាការកុហកសុទ្ធសាធ ហើយរឿងបែបនេះពិតជាមិនមាននោះទេ»។
យោងតាមរបាយការណ៍ប្រព័ន្ធផ្សព្វផ្សាយ លិខិតរបស់លោក ប៉េហ្សេសគីយ៉ាន បានបញ្ជាក់ថា អ៊ីរ៉ង់ «មិនស្វែងរកការ ប្រឈមមុខដាក់គ្នាទេ» មានគោលបំណងពង្រឹងកិច្ចសហប្រតិបត្តិការក្នុងតំបន់ និងនៅតែ «បើកចំហ ចំពោះការដោះស្រាយជម្លោះនុយក្លេអ៊ែរ តាមរយៈការទូត ដោយថា សិទ្ធិរបស់ខ្លួនត្រូវបានធានា»។
នៅក្នុងសុន្ទរកថារបស់លោក ខាមេនី បានរិះគន់យ៉ាងខ្លាំងចំពោះការគាំទ្ររបស់ទីក្រុងវ៉ាស៊ីនតោនចំពោះ “សង្គ្រាម និងឧក្រិដ្ឋកម្ម” របស់អ៊ីស្រាអែលនៅអាស៊ីខាងលិច ដោយចោទ ប្រកាន់សហរដ្ឋអាមេរិកថា បានបញ្ឆេះ ជម្លោះសកលដើម្បីទទួលបាន ផលប្រយោជន៍ ជាយុទ្ធសាស្ត្រ និងធនធាន។ មន្ត្រីអ៊ីរ៉ង់បានសង្កត់ធ្ងន់រួច ហើយនៅក្នុងប៉ុន្មានថ្ងៃថ្មីៗនេះថា សាររបស់លោក ប៉េហ្សេសគីយ៉ាន ទៅកាន់ព្រះអង្គម្ចាស់រាជទាយាទអារ៉ាប៊ីសាអូឌីត បានលើកឡើងតែបញ្ហាទ្វេភាគីប៉ុណ្ណោះ។
ទីក្រុងតេអេរ៉ង់ និងទីក្រុងវ៉ាស៊ីនតោនបានធ្វើកិច្ចចរចាដោយប្រយោលចំនួន ៥ជុំ ដែលសម្របសម្រួលដោយអូម៉ង់ ស្តីពីកម្មវិធីនុយក្លេអ៊ែររបស់អ៊ីរ៉ង់ និងទណ្ឌកម្មរបស់សហរដ្ឋអាមេរិក រវាងខែមេសា និងខែមិថុនា ដោយមានការរំពឹងទុកជុំទី៦ មុនពេលអ៊ីស្រាអែល បើកការវាយប្រហារដោយមិនបានរំពឹងទុកលើទីតាំងជាច្រើននៅក្នុងប្រទេសអ៊ីរ៉ង់ ដោយបានសម្លាប់ មេបញ្ជាការជាន់ខ្ពស់ អ្នកវិទ្យាសាស្ត្រ នុយក្លេអ៊ែរ និងជនស៊ីវិលជាច្រើននាក់ ហើយអ៊ីរ៉ង់ក៏បានឆ្លើយតប ដោយការវាយប្រហារដោយមីស៊ីល និងយន្តហោះ គ្មានមនុស្សបើកផងដែរ៕
