ប្រទេសចិន ជំរុញឲ្យអាមេរិកលុបចោលទណ្ឌកម្ម និងការរឹតត្បិតប្រឆាំង នឹងប្រទេសគុយបា ជាបន្ទាន់
ប៉េកាំង៖ អ្នកនាំពាក្យក្រសួងការបរទេសចិន លោក Guo Jiakun បានឲ្យដឹងថា ប្រទេសចិនជំរុញឱ្យសហរដ្ឋអាមេរិក យកចិត្តទុកដាក់ចំពោះការអំពាវនាវ ពីសហគមន៍អន្តរជាតិ និងលុបចោលទណ្ឌកម្ម ក៏ដូចជាការរឹតត្បិងរបស់ខ្លួន ប្រឆាំងនឹងប្រទេសគុយបាជាបន្ទាន់ នេះបយោងតាមការចុះផ្សាយរបស់ទីភ្នាក់ងារ សារព័ត៌មានចិនស៊ិនហួ។
ការកត់សម្គាល់របស់លោក Guo បានកើតឡើង បន្ទាប់ពីលោកស្រី Alena Douhan អ្នករាយការណ៍ពិសេស របស់អង្គការសហប្រជាជាតិ ស្តីពីផលប៉ះពាល់អវិជ្ជមាននៃវិធានការ បង្ខិតបង្ខំឯកតោភាគីលើការទទួលបានសិទ្ធិមនុស្ស បានទៅទស្សនាប្រទេសគុយបា ហើយបានកត់សម្គាល់ នៅក្នុងរបាយការណ៍បឋមមួយថា ទណ្ឌកម្មរបស់សហរដ្ឋអាមេរិក មានផលប៉ះពាល់យ៉ាងធ្ងន់ធ្ងរ ដល់សេដ្ឋកិច្ច និងស្ថានភាពមនុស្សធម៌របស់ប្រទេសគុយបា និងបានរំលោភ លើបទដ្ឋានជាច្រើននៃច្បាប់អន្តរជាតិ។
លោក បានប្រាប់សន្និសីទសារ ព័ត៌មានប្រចាំថ្ងៃថា របាយការណ៍នេះ យល់ស្របទាំងស្រុង ជាមួយនឹងសេចក្តី សម្រេចថ្មីៗនេះ ដែលបានអនុម័ត ដោយ មហាសន្និបាតអង្គការសហប្រជាជាតិ ដោយមានសំឡេងភាគច្រើន លើសលប់ជំរុញឱ្យសហរដ្ឋអាមេរិកបញ្ចប់ទណ្ឌកម្ម របស់ខ្លួនប្រឆាំងនឹងប្រទេសគុយបា។
ដោយកត់សម្គាល់ថា ប្រទេសចិន តែងតែប្រឆាំងនឹងការបិទផ្លូវ និងទណ្ឌកម្មរបស់សហរដ្ឋអាមេរិកប្រឆាំងនឹងប្រទេសគុយបា លោក Guo បានលើកឡើងថា ប្រទេសចិន ជំរុញឱ្យសហរដ្ឋអាមេរិក យកចិត្តទុកដាក់ ចំពោះការអំពាវនាវ ពីសហគមន៍អន្តរជាតិ លុបចោលការបិទផ្លូវ និងទណ្ឌកម្មរបស់ខ្លួនប្រឆាំងនឹងប្រទេសគុយបាជាបន្ទាន់ និងដកប្រទេសគុយបាចេញពីបញ្ជី «រដ្ឋឧបត្ថម្ភភេរវកម្ម»៕
ប្រែសម្រួល ឈូក បូរ៉ា
