ផែនការ៥ឆ្នាំ លើកទី១៥ របស់ប្រទេសចិន បង្កើនការយល់ដឹងដល់កម្ពុជា
ភ្នំពេញ ៖ រសៀលថ្ងៃទី២៨ ខែវិច្ឆិកា ឆ្នាំ២០២៥ នៅសមាគមមិត្តភាពកម្ពុជា-ចិន មានរៀបចំវេទិកាតុមូលស្តីពី«ផែនការ៥ឆ្នាំលើកទី១៥របស់ប្រទេសចិន» ក្រោមកិច្ចសហការ រវាងមូលនិធិចិន ដើម្បីសន្តិភាពនិងការអភិវឌ្ឍ និង សមាគមអ្នកស្រាវជ្រាវវឌ្ឍនភាពកម្ពុជា-ចិន ដោយផ្តោតលើប្រធានបទ «កាលានុវត្តភាពថ្មីៗ សម្រាប់កិច្ចសហប្រតិបត្តិការ ហិរញ្ញវត្ថុរវាងកម្ពុជា និង ចិន» ក្រោមអធិបតីភាពរបស់លោក ឯក សំអុល ឧត្តមទីប្រឹក្សាផ្ទាល់ ព្រះមហាក្សត្រ និងជាប្រធាន សមាគមមិត្តភាពកម្ពុជា-ចិន និង ស្ថានទូតចិន ប្រចាំកម្ពុជា-ចិន ព្រមទាំងអ្នកចូលរួមសរុបជាង១០០រូប មកពីតំណាងអគ្គលេខាធិការដ្ឋាន ព្រឹទ្ធសភា អគ្គលេខាធិការដ្ឋានរដ្ឋសភា ក្រសួងនិងស្ថាប័នសាធារណៈចំនួន២៧ ក្រុមបញ្ញាញាណជាន់ខ្ពស់ បណ្តាញអ្នកសារព័ត៌មាន និងបណ្តាញសង្គមស៊ីវិលនានាទាំងកម្ពុជា ទាំងចិន ។
ថ្លែងនៅក្នុង ពិធីបើកវេទិកាតុមូលនេះ លោក ឯក សំអុល បានមានប្រសាសន៍ថា ផែនការ៥ឆ្នាំលើកទី១៥ របស់ប្រទេសចិន មិនត្រឹមផ្តល់វឌ្ឍនភាព ដល់ប្រទេសចិនប៉ុណ្ណោះទេ ថែមទាំងជាកាលានុវត្តភាព ដល់បណ្តាប្រទេសនានាក្នុងពិភពលោក ជាពិសេសកម្ពុជាដែលជាមិត្តដែកថែបរបស់ចិន ដើម្បីរៀបចំផែនការមេរបស់ខ្លួនបន្ស៊ីជាមួយប្រទេសចិន ។ លោកយល់ថា តាមរយៈវាគ្មិនទាំងកម្ពុជា ទាំងចិន នឹងរួមគ្នាផ្តល់ធាតុចូល កាន់តែច្រើនសម្រាប់ចាក់បញ្ចូល ទៅក្នុងកិច្ចសហប្រតិបត្តិការហិរញ្ញវត្ថុរវាងកម្ពុជា និង ចិន ។
លោក ជាំង ណាន អគ្គទីប្រឹក្សាស្ថានទូតចិនប្រចាំកម្ពុជា បានកត់សម្គាល់ថា «ផែនការ៥ឆ្នាំ» គឺជាឧត្តមភាពដ៏លេចធ្លោនៃ «អភិបាលកិច្ចចិន» ដែលឆ្លុះបញ្ចាំងពីបទពិសោធន៍ដ៏សំខាន់របស់បក្សកុម្មុយនិស្តចិនក្នុងការគ្រប់គ្រងប្រទេស និងឧត្តមភាពនយោបាយនៃប្រព័ន្ធសង្គមនិយមបែបផែនចិន។ នៅលើដំណើរថ្មីនៃ «ផែនការ៥ឆ្នាំ លើកទី១៥» ភាគីចិនមានឆន្ទៈរួមជាមួយភាគីកម្ពុជាក្នុងការអនុវត្តឱ្យបានល្អនូវលទ្ធផលនៃដំណើរទស្សនកិច្ចរបស់ លោក XI Jinping ប្រធានរដ្ឋចិន មកកាន់កម្ពុជា ចែករំលែកឱកាស អភិវឌ្ឍន៍ដែលកើតចេញពីការបើកចំហកម្រិតខ្ពស់ បន្តរួមគ្នាកសាងទំនុកចិត្ត នយោបាយក្នុងកម្រិតខ្ពស់ ពង្រីកកិច្ចសហប្រតិបត្តិការ ដែលផ្តល់ផលប្រយោជន៍ទៅវិញទៅមកប្រកបដោយគុណភាពខ្ពស់ កសាងរបាំងការពារ សន្តិសុខក្នុងកម្រិតខ្ពស់ អនុវត្តការផ្លាស់ប្តូរប្រជាជន និងប្រជាជនឱ្យកាន់តែញឹកញាប់ និងសម្របសម្រួលយុទ្ធសាស្ត្រតាមស្តង់ដារខ្ពស់។
លោកស្រី Wang Yahui ប្រធានការិយាល័យមូលនិធិចិន ដើម្បីសន្តិភាព (CFPD) ប្រចាំកម្ពុជាបានថ្លែងថា ជំនួបរវាងវាគ្មិនទាំងអស់ ក្នុងវេទិកាតុមូលនេះ នឹងផ្តល់ទឡ្ហីករណ៍គូសបញ្ជាក់កាន់តែច្រាស់ពីគុណតម្លៃនៃ«ផែនការ៥ឆ្នាំលើកទី១៥»របស់ប្រទេសចិន ហើយក៏ជាការគូសរំលេចពីផលវិជ្ជមាន និងតួនាទីកាន់តែសកម្មរបស់ប្រទេសចិន ក្នុងរយៈពេល៥ឆ្នាំ (២០២៦-២០៣០)ក្នុងការចែករំលែកផល កាន់ច្រើនដល់បណ្តាប្រទេសនានា ក្នុងសកលលោក ។ ក្នុងនាមសង្គមស៊ីវិល របស់ប្រទេសចិនប្រចាំកម្ពុជា CFPD នឹងបង្កើនកម្លាំងរបស់ខ្លួនកាន់តែសកម្ម ដើម្បីឆ្លើយតបបាននឹង ខ្លឹមសារជាសារវន្តនៃ «ផែនការ ៥ឆ្នាំលើកទី១៥» ដើម្បីបង្កើន ទំនុកចិត្តកាន់តខ្លាំងក្លាបន្ថែមទៀត នៃចំណងទាក់ទងកាន់តែស្អិត រមួតរវាងប្រជាជននិងប្រជាជន កម្ពុជានិងចិន ។
លោកបណ្ឌិត ឈី ខាង អនុប្រធានវិទ្យាស្ថានស្រាវជ្រាវហិរញ្ញវត្ថុរបស់ធនាគារចិន បានថ្លែងថា សេចក្តីព្រាងផែនការ៥ឆ្នាំលើកទី១៥ មានគោលដៅយ៉ាងច្បាស់អំពី “ការពន្លឿនការកសាងប្រទេសហិរញ្ញ វត្ថុដ៏រឹងមាំ” ដែលបង្ហាញពីការធ្វើឱ្យប្រសើរឡើង ជាយុទ្ធសាស្ត្រសម្រាប់ឧស្សាហកម្ម ហិរញ្ញវត្ថុរបស់ប្រទេសចិនដោយផ្អែកលើសមិទ្ធផលផែនការ៥ឆ្នាំលើកទី១៤ ។
លោក លឹម វិសាល អគ្គលេខាធិការរង នៃក្រុមប្រឹក្សាអភិវឌ្ឍកម្ពុជា បានថ្លែងនូវក្នុងបទបង្ហាញរបស់ខ្លួន ដោយគូសរំលេចពីសក្តានុពលភាព នៃភាពទាក់ទាញរបស់កម្ពុជាក្នុងការជំរុញ វិនិយោគិនចិនមកវិនិយោគនៅកម្ពុជា ។
លោក អ៊ុក សារ៉ាត អគ្គនាយករងប្រតិបត្តិការ ធនាគារជាតិនៃកម្ពុជាបានរំលេចពីផលវិជ្ជមានដែលទទួលបានពីប្រព័ន្ធទូទាត់ប្រាក់យាន់នៅក្នុងវិស័យធនាគារ ហើយបានផ្តល់ជាកាលានុវត្តភាពកាន់តែប្រសើរដល់កិច្ចបង្កើនទំនាក់ទំនងរវាងប្រជាជននិងប្រជាជន វិស័យឯកជន និង រដ្ឋាភិបាលនៃប្រទេសយើងទាំងពីរ កម្ពុជា-ចិន។
លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិនបានថ្លែងនូវការកោតសរសើរចំពោះសមាគមមិត្តភាពកម្ពុជា-ចិន ស្ថានទូតចិនប្រចាំកម្ពុជា និងCFPD ក្នុងការគាំទ្រដល់វេទិកាតុមូលនេះ ដោយបានផ្តល់ផលកាន់តែខ្លាំង ចាក់បញ្ចូលទៅក្នុង«ផែនការ៥ឆ្នាំលើកទី១៥» ដើម្បីបង្កើនកិច្ចសហការកាន់តែជិតស្និទ្ធលើ វិស័យហិរញ្ញវត្ថុនៃប្រទេសយើងទាំងពីរ កម្ពុជានិងចិន ។
តាមរយៈវេទិកាដ៏មានសារៈសំខាន់នេះ លោក សួង ហួត ប្រធានសមាគម អ្នកអប់រំជាតិដើម្បីអភិវឌ្ឍន៍ បានថ្លែងថា វេទិកានេះមិនត្រឹមយល់កាន់តែស៊ីជម្រៅ ពីផែនការប្រាំឆ្នាំដែលជាស៊េរី នៃគំនិតផ្តួចផ្តើមអភិវឌ្ឍន៍សង្គម និងសេដ្ឋកិច្ច ក្នុងគោលនយោបាយរបស់ប្រទេសចិនចាប់តាំងពីឆ្នាំ១៩៥៣ប៉ុណ្ណោះទេ ថែមទាំងយល់ដឹងកាន់តែប្រត្យក្សពីកាលានុវត្តភាពដែលប្រទេសកម្ពុជាទទួលបានជាពិសេសកិច្ចសហប្រតិបត្តិការលើវិស័យហិរញ្ញវត្ថុ។ ដូចទៅនឹងសមាជិកអង្គពិធី លោកនឹងពាំនាំយកនូវខ្លឹមសារទាំងនេះរួម ជាមួយឯកសារដែលទទួលបានពីវេទិកា នារសៀលនេះទៅចែករំលែកជូន ដល់សមាជិកនានា របស់សមាគម និងអ្នកពាក់ព័ន្ធនានាឱ្យយល់កាន់តែស៊ីជម្រៅ ពី«ផែនការ៥ឆ្នាំលើកទី១៥»របស់ប្រទេសចិន ៕
