ក្រសួងអភិវឌ្ឍន៍ជនបទ បើកសិក្ខាសាលា ផ្សព្វផ្សាយគោល នយោបាយជាតិស្តីពី ការអភិវឌ្ឍជនបទ ឆ្នាំ២០២៥-២០៣៥ និងវគ្គបណ្ដុះបណ្ដាលភាព ជាអ្នកដឹកនាំ ក្នុងវិស័យអភិវឌ្ឍន៍ជនបទ វគ្គទី៥
ភ្នំពេញ ៖ លោក ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ នាព្រឹកថ្ងៃទី១ ខែធ្នូ ឆ្នាំ២០២៥ បានអញ្ជើញជាអធិបតីក្នុងពិធីបើកសិក្ខាសាលា ផ្សព្វផ្សាយគោលនយោបាយជាតិស្តីពី ការអភិវឌ្ឍជនបទ ឆ្នាំ២០២៥-២០៣៥ និងវគ្គបណ្ដុះបណ្ដាលភាពជាអ្នកដឹកនាំក្នុងវិស័យអភិវឌ្ឍន៍ជនបទវគ្គទី៥ ជូនដល់ថ្នាក់ដឹកនាំគ្រប់លំដាប់ថ្នាក់, មន្ទីរអភិវឌ្ឍន៍ជនបទទាំង ២៥រាជធានី-ខេត្ត មន្ត្រីរាជការគ្រប់លំដាប់ថ្នាក់ នៅក្រសួងអភិវឌ្ឍន៍ជនបទ និងតាមប្រព័ន្ធនិម្មិត ZOOM ។
អញ្ជើញមានប្រសាសន៍ក្នុងពិធីបើក លោក ឆាយ ឫទ្ធិសែន បានជម្រាបជូនថា សិក្ខាសាលាផ្សព្វផ្សាយ និងវគ្គបណ្ដុះបណ្ដាលនាពេលនេះ នឹងប្រព្រឹត្តទៅរយៈពេល២ថ្ងៃ គឺនាថ្ងៃទី១-២ ខែធ្នូ ឆ្នាំ២០២៥ ក្នុងគោលបំណងបញ្ជ្រាបការយល់ដឹងឱ្យកាន់តែស៊ីជម្រៅ ដើម្បីអាចចូលរួមអនុវត្តគោលនយោបាយជាតិស្តីពីការអភិវឌ្ឍជនបទ ឆ្នាំ២០២៥-២០៣៥ នេះឱ្យមានប្រសិទ្ធិភាព និងសក្ក័សិទ្ធភាពខ្ពស់។
លោករដ្ឋមន្ត្រី បានគូសបញ្ជាក់ជូនអង្គពិធីផងដែថា គោលនយោបាយជាតិស្តីពី ការអភិវឌ្ឍជនបទ ឆ្នាំ២០២៥-២០៣៥ នេះទើបត្រូវបានឯកភាព និងទទួលបានការអនុម័តដាក់ឱ្យអនុវត្តជាផ្លូវការ ដោយកិច្ចប្រជុំពេញអង្គគណៈរដ្ឋមន្ត្រី នាថ្ងៃទី២៨ ខែវិច្ឆិកា ឆ្នាំ២០២៥ កន្លងទៅនេះ។
លោករដ្ឋមន្ត្រី បានបន្តលើកឡើងទៀតថា នេះជាលើកទី១ហើយ ដែលក្រសួងអភិវឌ្ឍន៍ជនបទ សម្រេចបាន នូវគោលនយោបាយជាតិ ស្តីពីការអភិវឌ្ឍជនបទ សម្រាប់រយៈពេលវែង ដើម្បីទុកជាត្រីវិស័យចង្អុលបង្ហាញផ្លូវ និងទិសដៅអភិវឌ្ឍន៍ជនបទឱ្យកាន់តែរីកចម្រើន ដោយផ្តោតសំខាន់ទៅលើតម្រូវការ ជាអាទិភាពនៃតំបន់ភូមិសាស្ត្រផ្សេងៗគ្នា នៅក្នុងព្រះរាជាណាចក្រកម្ពុជា ។ គោលនយោបាយនេះ បានកំណត់ចក្ខុវិស័យ “កសាងសង្គមជនបទកម្ពុជាឱ្យមានវិបុលភាពប្រកបដោយ បរិយាបន្ន សមធម៌ និងចីរភាព” និងមានគោលបំណងធ្វើឱ្យ “ប្រជាជននៅតំបន់ជនបទមានជីវភាព សមរម្យប្រកបដោយភាពធន់ មានសុខភាពមាំមួន រស់នៅក្នុងបរិស្ថានល្អ ដោយចីរភាពនិងមានសេចក្តីថ្លៃថ្នូរ” ដែលជាមូលដ្ឋានដ៏សំខាន់មួយសម្រាប់គាំទ្រដល់ការអនុវត្ត យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧នៃរដ្ឋសភា ក្រោមការដឹកនាំបន្តវេនប្រកបដោយគតិបណ្ឌិត និងថាមវន្ដរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីឆ្ពោះទៅសម្រេចបានចក្ខុវិស័យ “កម្ពុជាក្លាយជាប្រទេសមានប្រាក់ចំណូលខ្ពស់នៅឆ្នាំ២០៥០”។
ជាចុងបញ្ចប់ លោករដ្ឋមន្ត្រី បានសម្តែងការថ្លែងអំណរគុណ ចំពោះថ្នាក់ដឹកនាំនាអាណត្តិមុន ដែលបានចាប់ផ្ដើមរៀបរៀងតាក់តែង សេចក្តីព្រាងគោលនបាយអភិវឌ្ឍន៍ជនបទ និងបន្សល់ទុកនូវសមិទ្ធផលជាច្រើន សម្រាប់អ្នកបន្តវេនក្នុងនិតិកាលថ្មី ។
លោករដ្ឋមន្ត្រី ក៏បានថ្លែងអំណរគុណ ចំពោះគណៈកម្មការចំពោះកិច្ចរៀបចំគោលនយោបាយ ក្នុងអាណត្តិថ្មី ដែលបានពិនិត្យ រៀបរៀងកែសម្រួលបញ្ជប់ សេចក្តីព្រាងគោលនយោបាយជាតិ ស្តីពីការអភិវឌ្ឍន៍ជន រហូតទទួលបានសេចក្តីទុកចិត្ត និងឯកភាពពីសំណាក់ រាជរដ្ឋាភិបាលកម្ពុជា ព្រមទាំងបានផ្ដល់អនុសាសន៍គន្លឹះមួយចំនួនដល់អង្គសិក្ខាសាលាទាំងមូល ត្រូវផ្តោតការយកចិត្តទុកដាក់ខ្ពស់ក្នុងការទទួលយកចំណេះដឹងថ្មីៗ ដើម្បីយកទៅបណ្ដុះបណ្ដាលបន្ដ និងអនុវត្តក្នុងការការងារ របស់ខ្លួនឱ្យមានប្រសិទ្ធភាពខ្ពស់៕
