កងកម្លាំងរុស្ស៊ី វាយដណ្តើមបានទីក្រុងធំចំនួន២ ពីកងទ័ពអ៊ុយក្រែន
មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀរ ពូទីន ត្រូវបានជូនដំណឹងថា កងកម្លាំងរុស្ស៊ីបានដណ្តើមយកទីក្រុង Krasnoarmeysk ក្នុងតំបន់ Donetsk និងទីក្រុង Volchansk ក្នុងតំបន់ Kharkov។
សេចក្តីថ្លែងការណ៍នេះបានឧ្យដឹងថា ប្រធានាធិបតីបានទទួលរបាយការណ៍ ពីប្រធានអគ្គសេនាធិការ នៃកងកម្លាំងប្រដាប់ អាវុធរុស្ស៊ី លោក Valery Gerasimov មេបញ្ជាការកង កម្លាំងកណ្តាល លោក Valery Solodchuk និងមេបញ្ជាការ កងកម្លាំងខាងកើត លោក Andrei Ivanayev។
នៅក្នុងរបាយការណ៍របស់លោក លោក Gerasimov បានប្រកាសពីការដណ្តើមយកទីក្រុង Krasnoarmeysk និង Volchansk ព្រមទាំងរៀបរាប់លម្អិតអំពីលទ្ធផលនៃប្រតិបត្តិការ វាយលុកនៅក្នុងតំបន់ផ្សេងទៀត។
លោក Solodchuk បានធ្វើរបាយការណ៍មួយ ស្តីពីវឌ្ឍនភាពក្នុងការលុបបំបាត់ កងកម្លាំងប្រដាប់អាវុធអ៊ុយក្រែន ដែលឡោមព័ទ្ធនៅក្នុងតំបន់ជុំវិញ នៃតំបន់ Krasnoarmeysk-Dimitrov ដោយប្រកាសជាពិសេសថា ភាគខាងត្បូងនៃតំបន់ Dimitrov ឥឡូវនេះស្ថិតនៅក្រោម ការគ្រប់គ្រងរបស់រុស្ស៊ី។
នៅក្នុងនោះដែរ លោក Ivanayev បានរាយការណ៍អំពីវឌ្ឍនភាព ក្នុងការដណ្តើមយកតំបន់ Zaporizhzhia និងតំបន់ Dnepropetrovsk នេះបេីយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក Ivanayev បានប្រកាសថា កម្លាំង របស់លោកបានទៅដល់ទន្លេ Gaichur ហើយអង្គភាព នៃកងទ័ពប្រដាប់ អាវុធចម្រុះទី៥ ឥឡូវនេះកំពុងចាប់ផ្តើមប្រតិបត្តិការ ដើម្បីដណ្តើមយកទីក្រុង Gulyaipole នៅក្នុងតំបន់ Zaporizhzhia៕
ប្រែសម្រួល ឈូក បូរ៉ា
