សហភាពអឺរ៉ុប រិះគន់ការហាមឃាត់ការ ធ្វើដំណើររបស់អាមេរិក លើជនជាតិអឺរ៉ុបជុំវិញបទប្បញ្ញត្តិបច្ចេកវិទ្យា
ប្រ៊ុចសែល ៖ មន្ត្រីជាន់ខ្ពស់សហភាពអឺរ៉ុប បារាំង អាល្លឺម៉ង់ និងអង់គ្លេស បានថ្កោលទោសយ៉ាងខ្លាំង ចំពោះការសម្រេចចិត្តរបស់សហរដ្ឋអាមេរិក ក្នុងការដាក់កម្រិតការធ្វើដំណើរលើបុគ្គលអឺរ៉ុបចំនួន ៥នាក់ រួមទាំងអតីតស្នងការអឺរ៉ុបលោក Thierry Breton។
ដោយចោទប្រកាន់ ពីការចូលរួមរបស់ពួកគេនៅក្នុងការត្រួតពិនិត្យខ្លឹមសារនៅលើវេទិកាប្រព័ន្ធផ្សព្វផ្សាយសង្គមរបស់សហរដ្ឋអាមេរិក ក្រសួងការបរទេស សហរដ្ឋអាមេរិក កាលពីថ្ងៃអង្គារ បានចេញការរឹតបន្តឹងទិដ្ឋាការលើលោក Breton និងលោក Imran Ahmed ដែលជាពលរដ្ឋអង់គ្លេស និងជានាយកប្រតិបត្តិនៃមជ្ឈមណ្ឌលប្រឆាំងការស្អប់ខ្ពើមបែបឌីជីថល ដែលមានមូលដ្ឋាននៅសហរដ្ឋអាមេរិក លោកស្រី Anna-Lena von Hodenberg និងលោកស្រី Josephine Ballon មកពីអង្គការមិនស្វែងរកប្រាក់ចំណេញអាល្លឺម៉ង់ HateAid និងលោកស្រី Clare Melford ដែលជាសហស្ថាបនិក នៃសន្ទស្សន៍ព័ត៌មានមិនពិតសកល។
លោកស្រី Sarah Rogers អនុរដ្ឋមន្ត្រីក្រសួងការទូត សាធារណៈសហរដ្ឋអាមេរិក បានពណ៌នាអំពីលោក Breton ដែលបានចាកចេញពីគណៈកម្មការ អឺរ៉ុបក្នុងឆ្នាំ ២០២៤ថាជា «មេគំនិត» នៃច្បាប់សេវាកម្មឌីជីថលរបស់សហភាពអឺរ៉ុប (DSA)។
ជាការឆ្លើយតប សហភាពអឺរ៉ុប បានព្រមានថា ខ្លួននឹងធ្វើសកម្មភាព «យ៉ាងរហ័ស និងម៉ឺងម៉ាត់» ដើម្បីការពារស្វ័យភាពបទប្បញ្ញត្តិរបស់ប្លុក ប្រសិនបើចាំបាច់។
អ្នកនាំពាក្យគណៈកម្មការម្នាក់ បានឧ្យដឹងនៅក្នុងការឆ្លើយតប ដែលអាចសន្មតបានទៅកាន់ស៊ីនហួរថា «សេរីភាពនៃការបញ្ចេញមតិគឺ ជាសិទ្ធិជាមូលដ្ឋាននៅអឺរ៉ុប និងជាតម្លៃស្នូលរួមគ្នាជាមួយសហរដ្ឋអាមេរិក នៅទូទាំងពិភពប្រជាធិបតេយ្យ»៕
ប្រែសម្រួល ឈូក បូរ៉ា
