ប្រធានាធិបតី បណ្តោះអាសន្ន របស់វេណេហ្ស៊ុយអេឡា ផ្តល់កិច្ចសហប្រតិបត្តិការជាមួយអាមេរិក បន្ទាប់ពីលោក Trump ព្រមានថា អាចនឹងមានការវាយប្រហារ បន្ថែមទៀត
បរទេស៖ ប្រធានាធិបតីស្តីទីរបស់វេណេហ្ស៊ុយអេឡា បានលើកឡើងកាលពីថ្ងៃអាទិត្យ ដើម្បីសហការជាមួយសហរដ្ឋអាមេរិកក្នុងរបៀបវារៈដែលផ្តោតលើ “ការវិវឌ្ឍន៍រួមគ្នា” ដែលបង្ហាញពីការផ្សះផ្សា ជាលើកដំបូងចាប់តាំងពីកងកម្លាំងសហរដ្ឋអាមេរិក បានចាប់ខ្លួនប្រធានាធិបតីប្រទេសសម្បូរប្រេងលោក Nicolas Maduro ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៥ ខែមករា ឆ្នាំ២០២៦ បានឱ្យដឹងថា នៅក្នុងសេចក្តីថ្លែងការណ៍មួយ ដែលត្រូវបានបង្ហោះ នៅលើប្រព័ន្ធផ្សព្វផ្សាយ សង្គម ប្រធានាធិបតីស្តីទីលោកស្រី Delcy Rodriguez បាននិយាយថា រដ្ឋាភិបាលរបស់លោកស្រី កំពុងផ្តល់អាទិភាពដល់ការផ្លាស់ប្តូរឆ្ពោះទៅរកទំនាក់ទំនង ប្រកបដោយការគោរពជាមួយសហរដ្ឋអាមេរិក ប៉ុន្តែលោកស្រីបានរិះគន់ ការវាយឆ្មក់កាលពីថ្ងៃសៅរ៍ថា ជាការចាប់យកខុសច្បាប់ សម្រាប់ធនធានជាតិរបស់ប្រទេស។
លោកស្រី Rodriguez បាននិយាយថា “យើងសូមអញ្ជើញរដ្ឋាភិបាល សហរដ្ឋអាមេរិកឱ្យសហការជាមួយយើង នៅក្នុងរបៀបវារៈ នៃកិច្ចសហប្រតិបត្តិការដែលផ្តោតលើការ អភិវឌ្ឍន៍រួមគ្នានៅក្នុងក្របខ័ណ្ឌនៃច្បាប់អន្តរជាតិដើម្បីពង្រឹងការរួមរស់សហគមន៍យូរអង្វែង” ។ “ប្រធានាធិបតី Donald Trump, ប្រជាជនរបស់យើង និងតំបន់របស់យើង សមនឹងទទួលបានសន្តិភាព និងការសន្ទនា មិនមែនសង្រ្គាមទេ”។
លោកស្រី Rodriguez ដែលបម្រើការជារដ្ឋមន្ត្រីប្រេងផងដែរនោះ ត្រូវបានគេចាត់ទុកថា ជាសមាជិកដ៏មានសុទិដ្ឋិនិយមបំផុតនៃរង្វង់ខាងក្នុងរបស់លោក Maduro ហើយលោក Trump បាននិយាយថា លោកស្រីមានឆន្ទៈក្នុងការធ្វើការជាមួយសហរដ្ឋអាមេរិក។
ទោះបីជាយ៉ាងណាក៏ដោយ ជាសាធារណៈ លោកស្រី និងមន្ត្រីផ្សេងទៀតបានហៅការឃុំខ្លួន Maduro និងភរិយា Cilia Flores ថាជាការចាប់ពង្រត់ ហើយបាននិយាយថា លោក Maduro នៅតែជាមេដឹកនាំស្របច្បាប់របស់ប្រទេស។
សូមបញ្ជាក់ថា លោក Trump បានប្រាប់អ្នកសារព័ត៌មានកាលពីថ្ងៃអាទិត្យថា លោកអាចបញ្ជាឱ្យមានការវាយប្រហារថែមទៀត ប្រសិនបើវេណេស៊ុយអេឡា មិនសហការជាមួយកិច្ចខិតខំប្រឹងប្រែងរបស់សហរដ្ឋអាមេរិក ដើម្បីបើកឧស្សាហកម្មប្រេងរបស់ខ្លួន និងបញ្ឈប់ការជួញដូរគ្រឿងញៀននោះទេ៕
