នាយករដ្ឋមន្ត្រីអ៊ីស្រាអែល ព្រមានអ៊ីរ៉ង់ អំពីការឆ្លើយតប ដែលមិនធ្លាប់មានពីមុនមក ប្រសិនបើខ្លួនត្រូវបានវាយប្រហារ
យេរូសាឡឹម៖ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានចេញការព្រមានយ៉ាងមុតមាំ មួយទៅកាន់អ៊ីរ៉ង់ កាលពីថ្ងៃចន្ទ ដោយសន្យាថា នឹងឆ្លើយតបដោយយោធា ដែលមិនធ្លាប់មានពីមុនមក ប្រសិនបើទីក្រុងតេអេរ៉ង់ វាយប្រហារអ៊ីស្រាអែល។ លោក ណេតាន់យ៉ាហ៊ូ បានប្រាប់សម័យប្រជុំនៃសភាថា «ប្រសិនបើអ៊ីរ៉ង់ធ្វើខុស ហើយវាយប្រហារយើង យើងនឹងធ្វើសកម្មភាពជាមួយកម្លាំងដែលអ៊ីរ៉ង់មិនទាន់បានដឹងនៅឡើយ»។
លោកបានលើកឡើងថា អ៊ីស្រាអែល កំពុងតាមដានអ៊ីរ៉ង់ «យ៉ាងដិតដល់» ដោយព្រមានថា «គ្មាននរណាម្នាក់អាចទស្សន៍ទាយ ពីអនាគតសម្រាប់អ៊ីរ៉ង់បាននោះទេ ប៉ុន្តែវានឹងមិនត្រលប់ទៅអ្វីដែលវាធ្លាប់មាននោះទេ» ដែលបង្កប់ន័យពីផលវិបាក ដែលមិនអាចត្រឡប់វិញ បានសម្រាប់ទីក្រុងតេអេរ៉ង់ នៅក្នុងជម្លោះណាមួយ។
ការកត់សម្គាល់នេះបានកើតឡើង នៅពេលដែលសហរដ្ឋអាមេរិក ត្រូវបានគេរាយការណ៍ថា កំពុងផ្លាស់ទីក្រុមវាយប្រហារ នាវាផ្ទុកយន្តហោះ USS Abraham Lincoln ដែលដើរដោយថាមពលនុយក្លេអ៊ែរទៅកាន់មជ្ឈិមបូព៌ា ចំពេលមានភាពតានតឹងកើនឡើងជាមួយអ៊ីរ៉ង់។
ដោយឡែកពីគ្នា លោក ណេតាន់យ៉ាហ៊ូ បានថ្លែងអំពីផែនការ ដឹកនាំដោយសហរដ្ឋអាមេរិក សម្រាប់ការគ្រប់គ្រង ក្រោយសង្គ្រាម របស់ហ្គាហ្សា ដែលក្នុងនោះមន្ត្រីតួកគី និងកាតាត្រូវបានគេលើកឡើងថា ជាអ្នកចូលរួមដែល អាចធ្វើទៅបាននៅក្នុង «ក្រុមប្រឹក្សាសន្តិភាព» ដែលប្រធានាធិបតីសហរដ្ឋអាមេរិក ដូណាល់ ត្រាំ ជាប្រធាន។
លោកបន្ដថា «យើងមានការខ្វែងគំនិតគ្នា មួយចំនួនជាមួយមិត្តភក្តិរបស់យើង នៅសហរដ្ឋអាមេរិក លើសមាសភាព នៃក្រុមប្រឹក្សាយោបល់ ដែលនឹងអមដំណើរ លើដំណើរការនានានៅក្នុងតំបន់ហ្គាហ្សា» ដោយបន្ថែមថា ទាំងទាហានតួក និងកាតា នឹងមិនត្រូវបានអនុញ្ញាតឱ្យចូលទៅក្នុងតំបន់នេះទេ៕
ប្រែសម្រួល ឈូក បូរ៉ា
