ចិន បដិសេធការចោទប្រកាន់ របស់សហរដ្ឋអាមេរិក លើបញ្ហាសមុទ្រចិនខាងត្បូង
អង្គការសហប្រជាជាតិ ៖ បេសកជនចិនម្នាក់បានបដិសេធ ការចោទប្រកាន់ របស់សហរដ្ឋអាមេរិកលើ បញ្ហាសមុទ្រចិនខាងត្បូង។ ចិន បដិសេធយ៉ាងដាច់អហង្ការ ចំពោះការកត់សម្គាល់ខុសឆ្គង របស់តំណាងសហរដ្ឋអាមេរិកអំពី “ការទាមទារដែនសមុទ្រដ៏ធំទូលាយ និងខុសច្បាប់របស់ចិន” នៅក្នុងសមុទ្រចិនខាងត្បូង នេះបើយោងតាមលោក Fu Cong តំណាងអចិន្ត្រៃយ៍របស់ចិនប្រចាំអង្គការសហប្រជាជាតិ។
លោកបានប្រាប់ការជជែកពិភាក្សាបើកចំហមួយរបស់ក្រុមប្រឹក្សាសន្តិសុខ ស្តីពីនីតិរដ្ឋអន្តរជាតិថា “ខ្ញុំចង់សង្កត់ធ្ងន់ថា ចិនមានអធិបតេយ្យភាព ដែលមិនអាចប្រកែកបានលើកោះ Nanhai Zhudao និងដែនទឹកជាប់គ្នា។ ចិនមានសិទ្ធិអធិបតេយ្យភាព និងយុត្តាធិការលើដែនទឹកពាក់ព័ន្ធ។ អធិបតេយ្យភាពទឹកដី និងសិទ្ធិ និងផលប្រយោជន៍ដែនសមុទ្ររបស់ចិននៅសមុទ្រចិនខាងត្បូង គឺផ្អែកលើមូលដ្ឋានប្រវត្តិសាស្ត្រ និងច្បាប់រឹងមាំ”។
លោកបានលេីកឡេីងថា «ខ្ញុំក៏ចង់
រំលឹកដល់តំណាងសហរដ្ឋអាមេរិកផងដែរថា សហរដ្ឋអាមេរិក មិនមែនជាភាគីនៃអនុសញ្ញាអង្គការសហប្រជាជាតិ ស្តីពីច្បាប់សមុទ្រ(UNCLOS) នោះទេ ហើយខ្លួនគ្មានសិទ្ធិសន្មតខ្លួនឯងថាជាចៅក្រមនៃ UNCLOS និងចង្អុលម្រាមដៃដាក់ប្រទេសដទៃទៀតនោះទេ»។
សហរដ្ឋអាមេរិក ដោយមិនអើពើទាំងស្រុង ចំពោះបរិបទប្រវត្តិសាស្ត្រ និងការពិតជាក់ស្តែងទាក់ទងនឹងសមុទ្រចិនខាងត្បូង បានញុះញង់បញ្ហា និងសាបព្រោះភាពមិនចុះសម្រុងគ្នាគ្រប់ទីកន្លែង។ សហរដ្ឋអាមេរិកថែមទាំងបានដាក់ ពង្រាយអាវុធវាយប្រហារ រួមទាំងមីស៊ីលរយៈចម្ងាយមធ្យម ដែលមានមូលដ្ឋានលើដីគោក នៅក្នុងសមុទ្រចិនខាងត្បូង។
ហើយក្រោមលេសនៃ «សេរីភាពនៃការធ្វើនាវាចរណ៍» ខ្លួនបានបញ្ជូននាវា និងយន្តហោះទំនើបៗជាញឹកញាប់ សម្រាប់ការឈ្លបយកការណ៍ និងសមយុទ្ធយោធានៅសមុទ្រចិនខាងត្បូង និងបានឈ្លានពានចូលទៅក្នុងដែនទឹក និងលំហអាកាសរបស់ប្រទេសចិន ក៏ដូចជាដែនទឹក និងដែនអាកាសជុំវិញកោះ និងថ្មប៉ប្រះទឹករបស់ប្រទេសចិនផងដែរ៕
ប្រែសម្រួល ឈូក បូរ៉ា
