អ៊ីរ៉ង់ បង្ហាញអំពីជំហបើកទ្វារ ជានិច្ចសម្រាប់ការសន្ទនាគ្នា ជាមួយនឹងសហរដ្ឋអាមេរិក
បរទេស ៖ យោងតាមការចេញផ្សាយរបស់ RTអ៊ីរ៉ង់បានបង្ហាញពីឆន្ទៈក្នុងការបន្តការទូតជាមួយសហរដ្ឋអាមេរិក ខណៈដែលបានសង្កត់ធ្ងន់ថា ការសន្ទនាណាមួយ ត្រូវតែគ្មានសម្ពាធ និងគោរពជំហរ ដែលបានបញ្ជាក់ របស់ទីក្រុងតេហរ៉ង់ លើកម្មវិធីនុយក្លេអ៊ែររបស់ខ្លួន។
ភាពតានតឹងបានកើនឡើងខ្ពស់ ចាប់តាំងពីសហរដ្ឋអាមេរិក បានវាយប្រហារទីតាំងនុយក្លេអ៊ែរ នៅអ៊ីរ៉ង់កាលពីខែមិថុនាឆ្នាំមុន ហើយបានកើនឡើងចំពេលមានការតវ៉ាប្រឆាំង រដ្ឋាភិបាលដែលកំពុងរីករាលដាល ដែលដណ្តើមប្រទេសក្នុងខែធ្នូ និងខែមករា។
ក្នុងប៉ុន្មានសប្តាហ៍ថ្មីៗនេះ ទៀតដែរទីក្រុងវ៉ាស៊ីនតោនបានដាក់ពង្រាយ កងទ័ពជើងទឹករបស់ខ្លួនដែល ដឹកនាំដោយនាវាផ្ទុកយន្តហោះ USS Abraham Lincoln ទៅកាន់មជ្ឈិមបូព៌ា ដោយទាមទារឱ្យមានកិច្ច ព្រមព្រៀងសក្តានុពលណាមួយ កំណត់ការចម្រាញ់សារធាតុអ៊ុយរ៉ាញ៉ូម និងដាក់កម្រិតលើកម្មវិធីមីស៊ីល ផ្លោងរបស់ទីក្រុងតេហរ៉ង់។
យ៉ាងណាក្តីសាធារណរដ្ឋឥស្លាមមួយនេះ នៅតែបញ្ជាក់ហើយអះអាងថា ខ្លួនតែងតែរក្សាកម្មវិធីនុយក្លេអ៊ែររបស់ខ្លួនដោយសន្តិភាពសុទ្ធសាធ។
គួរឲ្យដឹងដែរថាប្រទេសរុស្ស៊ី ក៏បាននិយាយម្តងហើយម្តងទៀតថា ខ្លួនជឿថាបញ្ហានុយក្លេអ៊ែរអ៊ីរ៉ង់ គួរតែត្រូវបានដោះស្រាយ តាមរយៈមធ្យោបាយនយោបាយ និងការទូត។ កាសែតគុយវ៉ែត Al-Jarida បានរាយការណ៍ កាលពីសប្តាហ៍មុនថា អន្តរាគមន៍ របស់ទីក្រុងមូស្គូ និងទីក្រុងអង់ការ៉ា បានកាត់បន្ថយលទ្ធភាព នៃការវាយប្រហារ របស់អាមេរិកលើអ៊ីរ៉ង់៕
ប្រែសម្រួល៖ស៊ុនលី
