អាមេរិក ចោទចិន នៅកណ្តាលសន្និសីទ រំសាយអាវុធ សកលថា បានធ្វើការសាកល្បង នុយក្លេអ៊ែរ សម្ងាត់មួយនៅឆ្នាំ ២០២០
បរទេស៖ សហរដ្ឋអាមេរិក កាលពីថ្ងៃសុក្រ បានចោទប្រកាន់ទីក្រុងប៉េកាំងថា បានធ្វើការសាកល្បង នុយក្លេអ៊ែរសម្ងាត់មួយនៅឆ្នាំ ២០២០ ខណៈដែលខ្លួនបានអំពាវនាវ ឱ្យមានសន្ធិសញ្ញាគ្រប់គ្រងអាវុធថ្មី និងទូលំទូលាយជាងមុន ដែលនឹងនាំប្រទេសចិន និងរុស្ស៊ីមកចូលរួម។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៧ ខែកុម្ភៈ ឆ្នាំ២០២៦ បានឱ្យដឹងថា ការចោទប្រកាន់នៅក្នុងសន្និសីទ រំសាយអាវុធសកល បានបង្ហាញពីភាពតានតឹងធ្ងន់ធ្ងរ រវាងទីក្រុងវ៉ាស៊ីនតោន និងទីក្រុងប៉េកាំងនៅពេលវេលាដ៏សំខាន់មួយ ក្នុងការគ្រប់គ្រងអាវុធនុយក្លេអ៊ែរ មួយថ្ងៃបន្ទាប់ពីសន្ធិសញ្ញាកំណត់ការដាក់ពង្រាយមីស៊ីល និងក្បាលគ្រាប់នុយក្លេអ៊ែរ របស់សហរដ្ឋអាមេរិក និងរុស្ស៊ី បានផុតកំណត់។
លោក Thomas DiNanno អនុរដ្ឋមន្ត្រីក្រសួងគ្រប់គ្រងអាវុធ និងសន្តិសុខអន្តរជាតិសហរដ្ឋអាមេរិកបានប្រាប់សន្និសីទរំសាយអាវុធនៅទីក្រុងហ្សឺណែវថា “ខ្ញុំអាចបង្ហាញថា រដ្ឋាភិបាល សហរដ្ឋអាមេរិកដឹងថា ប្រទេសចិនបានធ្វើតេស្តគ្រាប់បែកនុយក្លេអ៊ែរ រួមទាំងការរៀបចំសម្រាប់ការធ្វើតេស្ត ជាមួយនឹងទិន្នផលដែលបាន កំណត់រាប់រយតោន”។
យោធាចិន “បានព្យាយាមលាក់បាំងការធ្វើតេស្ត ដោយបិទបាំងការផ្ទុះនុយក្លេអ៊ែរ ពីព្រោះខ្លួនទទួលស្គាល់ថា ការធ្វើតេស្តទាំងនេះ រំលោភលើការប្តេជ្ញាចិត្ត ហាមឃាត់ការធ្វើតេស្ត ។ ប្រទេសចិនបានប្រើ ‘ការកាត់ផ្ដាច់’ ដែលជាវិធីសាស្ត្រមួយដើម្បីកាត់បន្ថយប្រសិទ្ធភាពនៃការត្រួតពិនិត្យរញ្ជួយដី ដើម្បីលាក់បាំងសកម្មភាព របស់ពួកគេពីពិភពលោក”៕
