ការនាំចូលប្រេង របស់ឥណ្ឌា ពីប្រទេសរុស្សី ធ្លាក់ចុះខ្លាំងក្នុងខែធ្នូ កន្លងមកនេះ
បរទេស ៖ យោងតាមការចេញផ្សាយរបស់ RT ប្រព័ន្ធផ្សព្វផ្សាយឥណ្ឌា បានរាយការណ៍កាលពីថ្ងៃសុក្រថា ការនាំចូលប្រេង របស់ប្រទេសឥណ្ឌា ពីប្រទេសរុស្ស៊ី បានធ្លាក់ចុះនៅក្នុងខែធ្នូ ។
ដំណឹងនេះធ្វើឡើង បន្ទាប់ពីការប្រកាស របស់ប្រធានាធិបតីអាមេរិក Donald Trump អំពីកិច្ចព្រមព្រៀងពាណិជ្ជកម្មដែលលោកបានអះអាងថា ទីក្រុង New Delhi បានយល់ព្រមបញ្ចប់ការទិញប្រេងពីរុស្ស៊ី។
ប្រទេសឥណ្ឌាមិនបានបញ្ជាក់ ពីការអះអាងនេះទេ ហើយនាយករដ្ឋមន្ត្រី Narendra Modi បានជៀសវាងការយោងណាមួយ ដែលភ្ជាប់កិច្ចព្រមព្រៀងពាណិជ្ជកម្ម ទៅនឹងការបញ្ឈប់ការទិញប្រេងពីរុស្ស៊ី។
កាសែតក្នុងស្រុកThe Hindu បានរាយការណ៍ថាការនាំចូលប្រេង ពីប្រទេសរុស្ស៊ីបានធ្លាក់ចុះដល់កម្រិតទាប ក្នុងរយៈពេល៣៨ខែ ដែលមានចំនួន២,៧ពាន់លានដុល្លារ នៅក្នុងខែធ្នូឆ្នាំ២០២៥ ។
យោងតាមរបាយការណ៍បានឱ្យដឹងថា ប្រេងរុស្ស៊ីឥឡូវនេះមានចំនួនតិច ជាងមួយភាគបួន នៃការនាំចូលរបស់ប្រទេសឥណ្ឌា ធ្លាក់ចុះពី៣៤ភាគរយកាលពីមួយខែមុន។
វាបានបន្ថែមទៀតថា ការនាំចូលពីសហរដ្ឋអាមេរិក បានកើនឡើង៣១ភាគរយ ទៅដល់៥៦៩,៣១លានដុល្លារក្នុងខែធ្នូ បើធៀបនឹងរយៈពេល ដូចគ្នាកាលពីឆ្នាំមុន ។ បរិមាណនៃការនាំចូលពីសហរដ្ឋអាមេរិកបានកើនឡើង ៥៨ភាគរយទៅដល់១,១លានតោន៕
ប្រែសម្រួល៖ស៊ុនលី
