អាមេរិក អនុញ្ញាតឱ្យប្រទេសឥណ្ឌា ទិញប្រេងពីរុស្ស៊ីវិញ ដើម្បីកាត់បន្ថយសម្ពាធរបស់អ៊ីរ៉ង់ ក្នុងការចាប់ ថាមពលសកលជាចំណាប់ខ្មាំង
បរទេស៖ បន្ទាប់ពីបានដាក់សម្ពាធលើប្រទេសឥណ្ឌា ឱ្យឈប់ទិញប្រេងរបស់រុស្ស៊ីអស់រយៈពេលជាច្រើនខែមក សហរដ្ឋអាមេរិក បានផ្តល់ការលើកលែង ជាបណ្ដោះអាសន្នដល់ទីក្រុងញូវដេលី ដោយអនុញ្ញាតឱ្យឥណ្ឌាអាចទិញប្រេងឥន្ធនៈពីរុស្ស៊ីវិញ ខណៈដែលសង្គ្រាមនៅមជ្ឈិមបូព៌ា កំណត់ការផ្គត់ផ្គង់ប្រេងសកល។
យោងតាមសារព័ត៌មាន The Kyiv Independent ចេញផ្សាយនៅថ្ងៃទី៦ ខែមីនា ឆ្នាំ២០២៦ថា លោក Scott Bessent រដ្ឋមន្ត្រីក្រសួងរតនាគារ សហរដ្ឋអាមេរិកបាននិយាយនៅក្នុងសារប្រព័ន្ធផ្សព្វផ្សាយសង្គមមួយនៅថ្ងៃទី ៥ ខែមីនាថា “ដើម្បីឱ្យប្រេងអាចបន្តហូរ ចូលទៅក្នុងទីផ្សារសកល ក្រសួងរតនាគារអាមេរិក បានចេញការលើកលែង ជាបណ្ដោះអាសន្នរយៈពេល ៣០ ថ្ងៃ ដើម្បីអនុញ្ញាតឱ្យក្រុមហ៊ុនចម្រាញ់ប្រេង របស់ឥណ្ឌាទិញប្រេងរបស់រុស្ស៊ី”។
លោកបានបន្ថែមថា “វិធានការរយៈពេលខ្លីដោយចេតនានេះ នឹងមិនផ្តល់អត្ថប្រយោជន៍ហិរញ្ញវត្ថុសំខាន់ៗដល់រដ្ឋាភិបាលរុស្ស៊ីទេ ព្រោះវាអនុញ្ញាតឱ្យមានប្រតិបត្តិការ ដែលពាក់ព័ន្ធនឹងប្រេងដែលជាប់គាំងនៅលើសមុទ្ររួចហើយ”។
លោក Bessent បានសរសេរថា “ប្រទេសឥណ្ឌាគឺជាដៃគូសំខាន់របស់សហរដ្ឋអាមេរិក” ដោយកត់សម្គាល់ថា ទីក្រុងវ៉ាស៊ីនតោនរំពឹងថា ទីក្រុងញូវដេលីនឹងបង្កើនការ ទិញប្រេងរបស់សហរដ្ឋអាមេរិក។ “វិធានការបញ្ឈប់គម្លាតនេះ នឹងកាត់បន្ថយសម្ពាធ ដែលបណ្តាលមកពីការប៉ុនប៉ងរបស់អ៊ីរ៉ង់ក្នុងការចាប់ជាចំណាប់ខ្មាំងថាមពលសកល”។
យោងតាមប្រភពចំនួនប្រាំមួយដែលស្គាល់ពីបញ្ហានេះ ដែលបាននិយាយជាមួយទីភ្នាក់ងារសារព័ត៌មាន Reuters បានឲ្យដឹងថា ក្រុមហ៊ុនចម្រាញ់ប្រេងនៅឥណ្ឌាបានចាប់ផ្តើមទិញប្រេងឆៅ រាប់លានបារ៉ែលពីរុស្ស៊ីភ្លាមៗ ខណៈដែលប្រទេសនេះកំពុងដោះស្រាយ បញ្ហាការផ្គត់ផ្គង់ប្រេងដ៏តឹងតែង ដែលបង្កឡើងដោយសង្គ្រាម អាមេរិក-អ៊ីស្រាអែលនៅអ៊ីរ៉ង់៕
ប្រែសម្រួលៈ ណៃ តុលា
