កិត្តិសង្គហបណ្ឌិត គន់ គីម ចុះពិនិត្យវឌ្ឍនភាពសាងសង់ជម្រកបណ្ដោះអាសន្ន សម្រាប់ជនភៀសសឹក នៅខេត្តព្រះវិហារ
ខេត្តព្រះវិហារ៖ នាថ្ងៃទី២៥ ខែមីនា ឆ្នាំ២០២៦ ក្នុងបរិបទនេះ លោក នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញចុះពិនិត្យដោយផ្ទាល់លើវឌ្ឍនភាពនៃការសាងសង់ជម្រកបណ្ដោះអាសន្ន សម្រាប់បងប្អូនជនភៀសសឹក នៅ ឃុំថ្មី ស្រុកគូលែន ខេត្តព្រះវិហារ។
ក្នុងអំឡុងពេលចុះពិនិត្យ លោកបានពិនិត្យយ៉ាងម៉ត់ចត់លើដំណើរការសាងសង់ គុណភាពសំណង់ និងសុវត្ថិភាពនៃជម្រក ដើម្បីធានាថា អាចផ្តល់ជាអាស្រ័យដ្ឋានបណ្តោះអាសន្នដែលមានសុវត្ថិភាព សមរម្យ និងមានអនាម័យល្អ សម្រាប់បងប្អូនប្រជាពលរដ្ឋដែលកំពុងប្រឈមមុខនឹងភាពលំបាក។
លោកក៏បានណែនាំដល់អាជ្ញាធរមូលដ្ឋាន ក្រុមការងារបច្ចេកទេស និងភាគីពាក់ព័ន្ធទាំងអស់ ឱ្យបន្តពន្លឿនល្បឿនសាងសង់ ដោយត្រូវគោរពតាមស្តង់ដារបច្ចេកទេស និងធានាគុណភាព ដើម្បីឱ្យជម្រកទាំងនេះអាចប្រើប្រាស់បានទាន់ពេលវេលា និងឆ្លើយតបតម្រូវការបន្ទាន់របស់ប្រជាពលរដ្ឋ។
ជាមួយគ្នានេះដែរ លោកបានគូសបញ្ជាក់ថា ការផ្តល់ជម្រកសមរម្យ គឺជាចំណុចសំខាន់មួយក្នុងការការពារសុវត្ថិភាព និងសេចក្តីថ្លៃថ្នូររបស់ជនភៀសសឹក ព្រមទាំងជួយធានាថាពួកគេអាចទទួលបានសេវាសង្គមមូលដ្ឋានដូចជា ទឹកស្អាត អនាម័យ និងសុខាភិបាល។
តាមរបាយការណ៍ពីអាជ្ញាធរមូលដ្ឋាន ការសាងសង់ជម្រកបានឈានទៅមុខយ៉ាងល្អប្រសើរ ហើយជាច្រើនខ្នាតកំពុងស្ថិតក្នុងដំណាក់កាលបញ្ចប់។ បន្ទាប់ពីសាងសង់រួចរាល់ ជម្រកទាំងនេះនឹងជួយបន្ថយការលំបាក និងលើកកម្ពស់គុណភាពជីវិតរបស់បងប្អូនជនភៀសសឹកយ៉ាងមានន័យ។
សកម្មភាពនេះបង្ហាញពីការសហការយ៉ាងជិតស្និទ្ធរវាងអាជ្ញាធរជាតិ អាជ្ញាធរមូលដ្ឋាន និងស្ថាប័នពាក់ព័ន្ធ ក្នុងការឆ្លើយតបនឹងស្ថានភាពបន្ទាន់ និងពង្រឹងសមត្ថភាពគ្រប់គ្រងគ្រោះមហន្តរាយនៅកម្ពុជា។
ក្រោមការដឹកនាំរបស់លោក គន់ គីម សមាគមអតីតយុទ្ធជនកម្ពុជា ក៏បានបន្តចូលរួមយ៉ាងសកម្មក្នុងសកម្មភាពសង្គម និងមនុស្សធម៌ ដើម្បីគាំទ្រដល់បងប្អូនអតីតយុទ្ធជន និងប្រជាពលរដ្ឋងាយរងគ្រោះនៅទូទាំងប្រទេស។
នៅក្នុងដំណើរចុះពិនិត្យនេះ បានបញ្ជាក់ជាថ្មីពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការមិនទុកឱ្យប្រជាពលរដ្ឋណាម្នាក់នៅក្រោយ ក្នុងអំឡុងពេលមានវិបត្តិ និងការលំបាក៕
ដោយ ៖ សួន ពិសិត|ដើមអម្ពិល
