យោធាអ៊ីរ៉ង់អះអាងថា បានវាយប្រហារលើទីតាំងមូលដ្ឋានទ័ព អាមេរិកនៅអារ៉ាប់រួមគុយវ៉ែត ជាមួយនឹងដ្រូននិងមីស៊ីល
បរទេស៖ទីភ្នាក់ងារចិនស៊ិនហួចេញផ្សាយ នៅថ្ងៃនេះបានឲ្យដឹងថា កងទ័ពអ៊ីរ៉ង់បាននិយាយកាលពីថ្ងៃព្រហស្បតិ៍ថា កងកម្លាំងរបស់ខ្លួនបានវាយប្រហារមូលដ្ឋានយោធា របស់សហរដ្ឋអាមេរិក ក្នុងប្រទេសអារ៉ាប់រួម (UAE) និងគុយវ៉ែតដោយមីស៊ីល និងយន្តហោះគ្មានមនុស្ស បើក kamikaze។
នៅក្នុងសេចក្តីថ្លែងការណ៍នៅលើ គេហទំព័ររបស់ខ្លួន កងទ័ពបាននិយាយថា ការវាយប្រហារនេះគឺជាការសងសឹក សម្រាប់បុគ្គលិកយោធា អ៊ីរ៉ង់ និងជនស៊ីវិលដែលត្រូវបានសម្លាប់នៅក្នុងការវាយប្រហារ របស់សហរដ្ឋអាមេរិកប្រឆាំងនឹងអ៊ីរ៉ង់នាពេលថ្មីៗនេះ។
ខ្លួនបានបន្ថែមថា កងកម្លាំងរបស់ខ្លួនបានកំណត់គោលដៅលើប្រព័ន្ធទំនាក់ទំនងផ្កាយរណប ឃ្លាំងឧបករណ៍ និងឃ្លាំងផ្ទុកយន្តហោះចម្បាំងរបស់កងទ័ពអាមេរិកនៅឯមូលដ្ឋានទ័ពអាកាស Ahmad al-Jaber ក្នុងប្រទេសគុយវ៉ែត ដែលបណ្តាលឱ្យខូចខាតដល់ប្រព័ន្ធទំនាក់ទំនងជាច្រើន។
កងទ័ពបាននិយាយថា ខ្លួនក៏បានវាយប្រហារលើកងទ័ពអាមេរិក និងប្រព័ន្ធរ៉ាដានៅឯមូលដ្ឋានទ័ពអាកាស Al Minhad ក្នុងប្រទេសអារ៉ាប់រួម ដោយសង្កត់ធ្ងន់ថា ការឆ្លើយតបរបស់កងកម្លាំងរបស់ខ្លួន ចំពោះការវាយប្រហារណាមួយដោយកងទ័ពសហរដ្ឋអាមេរិកនឹង ឃោរឃៅ និងបំផ្លិចបំផ្លាញ ហើយនឹង បន្តរហូតដល់សម្រេចបាននូវជ័យជំនះ ចុងក្រោយ និងការដាក់ទណ្ឌកម្មអ្នកឈ្លានពាន។
កាលពីថ្ងៃពុធកន្លងមកនេះ ទីបញ្ជាការកណ្តាល របស់សហរដ្ឋអាមេរិក បាននិយាយនៅក្នុងការបង្ហោះ នៅលើប្រព័ន្ធផ្សព្វផ្សាយសង្គម X ថាកងកម្លាំងរបស់ខ្លួន បានបញ្ចប់ដោយជោគជ័យនូវការវាយប្រហារប្រឆាំង នឹងគោលដៅយោធាអ៊ីរ៉ង់ដោយលើកឡើងការប៉ុនប៉ងវាយប្រហារថ្មីៗនេះដោយកងឆ្មាំបដិវត្តន៍អ៊ីស្លាមប្រឆាំងនឹងការដឹកជញ្ជូនពាណិជ្ជកម្មនៅច្រកសមុទ្រ Hormuz និងប្រឆាំងនឹងកងកម្លាំងយោធាអាមេរិក៕
ប្រែសម្រួល៖ស៊ុនលី
