មេបញ្ជាការ កងពលតូច ដឹកជញ្ជូនលេខ៩៩ ត្រួតពិនិត្យ កម្លាំងប្រចាំសប្តាហ៍-វិន័យរឹងមាំ កម្លាំងត្រៀមខ្លួន និងស្មារតីបំពេញភារកិច្ច របស់យោធិនកងដឹកជញ្ជូន
ភ្នំពេញ ៖ នាព្រឹកថ្ងៃទី៧ ខែកញ្ញា ឆ្នាំ២០២៦នេះ ឧត្តមសេនីយ៍ទោ ហ៊ុល សំអុន មេបញ្ជាការ កងពលតូចដឹកជញ្ជូនលេខ៩៩ បានដឹកនាំការត្រួតពិនិត្យកម្លាំងទ័ពប្រចាំសប្តាហ៍ ដើម្បីផ្សព្វផ្សាយសភាពការណ៍ថ្មីៗ ពិនិត្យវត្តមាន វិន័យ និងស្ថានភាពត្រៀមលក្ខណៈរបស់យោធិនទាំងមូល។
សម្រាប់ យោធិនកងដឹកជញ្ជូន ការត្រៀមខ្លួន មិនមែនមានន័យត្រឹមតែការឈរជាជួរ និងមានវត្តមានគ្រប់គ្នានោះទេ។ វាមានន័យថា មនុស្សត្រៀមខ្លួន យានយន្តត្រៀមខ្លួន សម្ភារៈត្រៀមខ្លួន និងផែនការត្រៀមខ្លួន ដើម្បីអាចចល័តកម្លាំង និងស្បៀង សម្ភារៈ ឬអនុវត្តភារកិច្ចផ្សេងៗបានទាន់ពេលវេលា នៅពេលមានបទបញ្ជា។
ក្នុងឱកាសនេះ ឧត្តមសេនីយ៍ទោ ហ៊ុល សំអុន បានក្រើនរំលឹកដល់យោធិនគ្រប់រូប ឱ្យយកចិត្តទុកដាក់ខ្ពស់លើវិន័យ សណ្តាប់ធ្នាប់ និងការទទួលខុសត្រូវក្នុងតួនាទីរបស់ខ្លួន។ ជាពិសេស អ្នកបើកបរ និងកម្លាំងបច្ចេកទេស ត្រូវបង្កើនការថែទាំ ត្រួតពិនិត្យ និងរក្សាស្ថានភាពយានយន្តឱ្យមានសុវត្ថិភាព និងត្រៀមប្រើប្រាស់ជានិច្ច។
ជាមួយគ្នានេះ ឧត្តមសេនីយ៍ទោ មេបញ្ជាការការ ក៏បានផ្សព្វផ្សាយសភាពការណ៍ជាតិ និងអន្តរជាតិ ក៏ជាចំណុចសំខាន់មួយ ដើម្បីឱ្យយោធិនមានការយល់ដឹង ប្រុងប្រយ័ត្ន និងមានស្មារតីទទួលខុសត្រូវខ្ពស់ចំពោះភារកិច្ចដែលខ្លួនកំពុងកាន់កាប់។
កងដឹកជញ្ជូន គឺជាកម្លាំងដែលត្រូវរួសរាន់ នៅពេលមានបទបញ្ជា។ នៅពីក្រោយរាល់ការចល័តកម្លាំង តែងមានស្នាមញើស របស់យោធិនកងដឹកជញ្ជូន។ដូច្នេះ វិន័យ និងការត្រៀមខ្លួន គឺជាកម្លាំងស្នូលដែលមិនអាចខ្វះបាន។
លោកមេបញ្ជាការ ក៏បានបញ្ជាក់យ៉ាងម៉ឺងម៉ាត់ថា យោធិនគ្រប់រូបត្រូវគោរពបទបញ្ជា បំពេញតួនាទីតាមការបែងចែក មានសាមគ្គីភាព និងរក្សាស្មារតីស្មោះត្រង់ចំពោះ ជាតិ សាសនា ព្រះមហាក្សត្រ ព្រមទាំងត្រៀមខ្លួនជានិច្ច ដើម្បីអនុវត្តរាល់ភារកិច្ចដែលថ្នាក់លើប្រគល់ជូន៕
