ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ថា កម្ពុជាមានឆន្ទៈនយោបាយខ្ពស់ និងប្តេជ្ញាចិត្តយ៉ាងមោះមុត ក្នុងការកែទម្រង់ច្បាប់ និងប្រព័ន្ធយុត្តិធម៌ សំដៅធានា ដល់ការគោរពសិទ្ធិមនុស្ស ដោយពង្រឹងការអនុវត្តច្បាប់ជាតិ បទដ្ឋានសិទ្ធិមនុស្សអន្តរជាតិ។
ក្នុងពីធីប្រកាសចូលកាន់មុខតំណែង សមាជិកគណៈកម្មាធិការជាតិ ប្រឆាំងទារុណកម្ម បំពាក់ឋាន្តរសក្តិ និងបំពាក់គ្រឿងឥស្សរយស ជូនមន្ត្រីលេខាធិការដ្ឋាន នៃគណៈកម្មាធិការជាតិប្រឆាំង ទារុណកម្មនៅព្រឹកថ្ងៃទី១១ ខែសីហា ឆ្នាំ២០២០ សម្តេចក្រឡាហោម ស ខេង មានប្រសាសន៍ថា «រាជរដ្ឋាភិបាលកម្ពុជាមានឆន្ទៈនយោបាយខ្ពស់ និងប្តេជ្ញាចិត្តយ៉ាងមោះមុត ក្នុងការកែទម្រង់ច្បាប់ និងប្រព័ន្ធយុត្តិធម៌ សំដៅធានាដល់ការគោរពសិទ្ធិមនុស្ស ដោយពង្រឹងការអនុវត្តច្បាប់ជាតិ បទដ្ឋានសិទ្ធិមនុស្សអន្តរជាតិ ជាពិសេសខិតខំបង្ការអំពើទារុណកម្ម ឬប្រព្រឹត្តកម្មមិនគប្បីណាមួយ កុំអោយកើតមានលើជន ដែលត្រូវបានដកហូតសេរីភាព»។
សម្ដេចក្រឡាហោមបន្ដថា ដើម្បីឲ្យការអនុវត្តកិច្ចការ នេះទទួលបានជោគជ័យ ទាមទារមន្ត្រីសាធារណៈនិង អាជ្ញាធរមានសមត្ថកិច្ច ទទួលបន្ទុកគ្រប់គ្រងជន ដែលត្រូវបានដកហូតសេរីភាព ត្រូវផ្លាស់ប្តូរផ្នត់គំនិត ឥរិយាបទ និងអប្បកិរិយារបស់ខ្លួន ជុំវិញការឃាត់ខ្លួន ការឃុំខ្លួន ការអប់រំកែប្រែ ការព្យាបាល ការស្តារ នីតិសម្បទាជនទាំងនោះផងដែរ។
សម្តេចក្រឡាហោម បន្ថែមថា ការធ្វើទារុណកម្ម និងប្រព្រឹត្តកម្ម មិនគប្បីដែលឃោរឃៅ អមនុស្សធម៌ ឬបន្ទាបបន្ថោក មិនមែនជាវិធានការចាំបាច់ដែលត្រូវ យកមកអនុវត្តចំពោះជនទាំងនោះឡើយ ផ្ទុយទៅវិញ ប្រព្រឹត្តកម្មបែបនេះជាអំពើខុសច្បាប់ និងរំលោភសិទ្ធិមនុស្សធ្ងន់ធ្ងរ ដែលមិនអាចទទួលបានលទ្ធផលវិជ្ជមាន ដូចការចង់បាននោះទេ ។ ចំណុចនេះធ្វើឲ្យប៉ះពាល់ដល់សេចក្តីថ្លៃថ្នូរ របស់មនុស្សជាតិ និងផ្តល់ការឈឺចាប់ដល់ជនទាំងនោះ ហើយអាចបង្កើតឡើង នូវគំនុំគំគួនគ្នាមិនចេះចប់។
ក្នុងឱកាសនោះដែរ រដ្ឋមន្ដ្រីក្រសួងមហាផ្ទៃ លើកឡើងថា កន្លងមកក្រសួងមហាផ្ទៃ ក៏បានចេញលិខិតស្តីពី ការចុះអប់រំផ្សព្វផ្សាយ លិខិតបទដ្ឋានគតិយុត្តិជាតិ និងអន្តរជាតិ ពាក់ព័ន្ធនិងកាធ្វើទារុណកម្ម និងការចុះអង្កេត ត្រួតពិនិត្យពន្ធនាគារ និងទីកន្លែងឃុំឃាំង បណ្តោះអាសន្ននានានៅតាមរាជធានី-ខេត្ត ដោយមិនផ្តល់ដំណឹងជាមុន ដល់គណៈអភិបាលរាជធានី -ខេត្ត អាជ្ញាធរគ្រប់គ្រងពន្ធនាគារ និងកន្លែងឃុំឃាំង ឬកន្លែងដកហូតសេរីភាពបណ្តោះអាសន្ន នៅតាមរាជធានី-ខេត្ត ដោយបង្កលក្ខណៈងាយស្រួល ដល់ប្រតិភូនៃគណៈកម្មាធិការជាតិប្រឆាំងទារុណកម្ម ដែលចុះបំពេញការងារ ជាពិសេសករណីដែលមានបាតុភាពជាក់ស្តែងកើតឡើង៕
ដោយ៖ អេង ប៊ូឆេង
