បរទេស៖ ខណៈពេលដែលចំនួនអ្នកស្លាប់ វីរុស វ៉ូហាននៅតែបន្តកើនឡើងប្រទេសចិន ត្រូវបានគេរាយការណ៍ថា បានទទួលរងនូវការឆ្លងដ៏គ្រោះថ្នាក់មួយទៀត ខណៈដែលអាជ្ញាធរមូលដ្ឋានបានរកឃើញថា មានវីរុស H5N1 ថ្មីដែលគេស្គាល់ជាទូទៅថាជាជំងឺផ្តាសាយបក្សី។
យោងតាមសារព័ត៌មាន Sputnik ចេញផ្សាយនៅថ្ងៃទី០២ ខែកុម្ភៈ ឆ្នាំ២០២០ បានឱ្យដឹងថា ក្រសួងកសិកម្មចិនបាននិយាយនៅថ្ងៃអាទិត្យថា មានការផ្ទុះជំងឺផ្តាសាយបក្សីថ្មី H5N1 នៅក្នុងខេត្តហ៊ូណាន ប៉ុន្តែបានអះអាងថា គ្មានករណីនៃការប៉ះពាល់មនុស្ស ត្រូវបានចុះបញ្ជីនោះទេ។
សេចក្តីថ្លែងការណ៍បាននិយាយថា “ ការផ្ទុះឡើងនៃជំងឺផ្តាសាយបក្សី H5N1 បានកើតឡើងនៅកសិដ្ឋានមួយក្នុងសង្កាត់ Shuangqing នៃទីក្រុង Shaoyang ខេត្ត Hunan” ។ លោកបន្ថែមថាកសិដ្ឋាន ដែលឆ្លងជំងឺនេះមានសត្វបក្សីប្រមាណ ៧៨៥០ ក្បាល ហើយបក្សីប្រមាណ ៤៥០០ ក្បាលបានងាប់ដោយសារជំងឺនេះ។
សូមជម្រាបថា វីរុស H5N1 ត្រូវបានគេរាយការណ៍ថា បានសម្លាប់មនុស្សជាច្រើននាក់នៅទូទាំងពិភពលោក ក្នុងរយៈពេលជាច្រើនទសវត្សចុងក្រោយនេះ។ ការផ្ទុះឡើងនៃជំងឺផ្តាសាយបក្សីត្រូវបានគេរាយការណ៍នៅក្នុងឆ្នាំ ២០០៩-២០១០ និងម្តងទៀតនៅឆ្នាំ ២០១៣-២០១៤ ។ ទាំងពីរដងអង្គការសុខភាពពិភពលោកនិងសហគមន៍អន្តរជាតិ បានខិតខំរួមគ្នាដើម្បីទប់ស្កាត់ ការឆ្លងរាលដាលដ៏គ្រោះថ្នាក់នេះ៕
ប្រែសម្រួលៈ ណៃ តុលា
