បរទេស៖ ទូរទស្សន៍ BBC ចេញផ្សាយនៅថ្ងៃសុក្រនេះ បានឲ្យដឹងថា ក្រុមហ៊ុនយក្ស Alibaba បានចាប់ផ្តើមធ្វើសកម្មភាព ដើម្បីលប់បំបាត់ភាពតានតឹង ជាមួយនឹងអាមេរិក នៅចំពេលដែលប្រធានាធិបតីអាមេរិក លោក Donald Trump កំពុងគម្រោមកំហែងខ្លាំង ដល់អាជីវកម្មទាំងឡាយ របស់ប្រទេសចិន។
ប្រធានប្រតិបត្តិការ របស់ក្រុមហ៊ុនយក្សចិនមួយនេះ គឺលោក Daniel Zhang បាននិយាយថា ក្រុមហ៊ុនលក់រាយរបស់ខ្លួន មានគោលនយោបាយដ៏ធំមួយ គឺគាំទ្រដល់ផលិតផល ម៉ាកយីហោទាំងឡាយរបស់អាមេរិក រួមមានទាំងអ្នកលក់រាយផង អាជីវកម្មខ្នាតតូចផង និងជាពិសេស គឺកសិករ ដែលជាជនជាតិអាមេរិកផង។
ការប្រកាសបែបនេះ ត្រូវបានគេមើលឃើញថា បានធ្វើឡើង នៅក្រោយពេលដែលតួលេខលក់ របស់ក្រុមហ៊ុនយក្សចិនមួយនេះ មានការកើនឡើងខ្លាំង ជាងការរំពឹងទុកនៅក្នុងត្រីមាសទី៣នេះ ហើយក៏នៅចំពេលដែលអាមេរិក កំពុងដាក់គំនាបខ្លាំង រាល់ក្រុមហ៊ុនយក្សធំៗ របស់ប្រទេសចិន៕
ប្រែសម្រួល៖ស៊ុនលី
