ព័ត៌មានអន្តរជាតិ

កូរ៉េខាងត្បូង៖ អគ្គិភ័យឆេះ អគារកម្ពស់៣៣ជាន់, មនុស្សរាប់រយនាក់ ត្រូវជម្លៀស ខណៈ ៨០នាក់ទៀត ត្រូវបញ្ជូនទៅមន្ទីរពេទ្យ ដោយសារស្រូបផ្សែង

បរទេស៖ ប្រព័ន្ធផ្សព្វផ្សាយក្នុងស្រុករបស់កូរ៉េខាងត្បូងបានផ្សាយថា ក្រុមពន្លត់អគ្គីភ័យនៅក្នុងប្រទេសកូរ៉េខាងត្បូង កំពុងព្យាយាមពន្លត់ភ្លើង នៅប្លុកប៉ម របស់អគារដែលមាន កម្ពស់៣៣ជាន់ នៅភាគខាងត្បូង នៃទីក្រុងអ៊ូលសាន របស់ប្រទេស កូរ៉េខាងត្បូង។

យោងតាមសារព័ត៌មាន BBC ចេញផ្សាយនៅថ្ងៃទី៩ ខែតុលា ឆ្នាំ២០២០ បានឱ្យដឹងថា មនុស្សរាប់រយនាក់ ត្រូវបានបង្ខំឱ្យជម្លៀសចេញ ហើយមនុស្សជាង៨០នាក់ ត្រូវបានបញ្ជូនទៅមន្ទីរពេទ្យ ដោយសារការស្រូបផ្សែង។

សេចក្តីរាយការណ៍បានឱ្យដឹងថា អគ្គិភ័យបានចាប់ផ្តើម នៅម៉ោងប្រហែល ២៣ និង ០០ នាទីម៉ោងក្នុងស្រុក (១៤:00 GMT) កាលពីថ្ងៃព្រហស្បតិ៍ ហើយរាលដាល កាន់តែខ្លាំងដោយខ្យល់បក់។

គិតមកត្រឹមនៅព្រឹកថ្ងៃសុក្រ ភ្លើងនៅតែមិនទាន់ត្រូវបានពន្លត់ទាំងស្រុងនៅឡើយទេ។ ទីភ្នាក់ងារព័ត៌មានកូរ៉េខាងត្បូងបាននិយាយថា ខ្យល់បក់ខ្លាំងធ្វើឱ្យពិបាកគ្រប់គ្រងភ្លើង។

អគ្គិភ័យនេះបានឆាបឆេះនៅចន្លោះជាន់ទី ៨និងទី១២ នៃអគារពាណិជ្ជកម្ម និងលំនៅដ្ឋានរបស់ Samhwan Art Nouveau ដែលមានចំនួនប្រហែល ១២០ គ្រួសារនិងអង្គភាពហាងលក់ទំនិញ៕

ប្រែសម្រួលៈ ណៃ តុលា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top