ក្រូអាត៖ ប្រធានាធិបតីក្រូអាត លោក Zoran Milanovic បានឲ្យដឹងថា សហរដ្ឋអាមេរិក និងអង្គការសន្ធិសញ្ញាអាត្លង់ទិកខាងជើង (NATO) កំពុងជាប់ពាក់ព័ន្ធក្នុងសង្គ្រាមប្រូកស៊ីប្រឆាំងនឹងរុស្ស៊ីតាមរយៈអ៊ុយក្រែន នេះបើតាមប្រព័ន្ធផ្សព្វផ្សាយក្រូអាត។
លោក Milanovic ត្រូវបានគេដកស្រង់សម្តីខណៈកំពុងថ្លែងសុន្ទរកថាក្នុងសន្និសីទមួយនៅទីក្រុង Vukovar ភាគខាងកើតប្រទេសកាលពីថ្ងៃអាទិត្យថា “វ៉ាស៊ីនតោន និងណាតូ កំពុងធ្វើសង្រ្គាមប្រូកស៊ីប្រឆាំងនឹងរុស្ស៊ីតាមរយៈអ៊ុយក្រែន”។
លើសពីនេះទៀត Milanovic បានថ្កោលទោសទណ្ឌកម្មរបស់លោកខាងលិចប្រឆាំងនឹងរុស្ស៊ី។លោក Milanovic បានបន្ថែមថា “ផែនការនេះមិនគួរនិយាយអំពីការដកប្រធានាធិបតីរុស្ស៊ីលោក វ្លាឌីមៀ ពូទីន ចេញពីតំណែងនោះទេ។
លោកអះអាងថា ផែនការមិនគួរនិយាយអំពីទណ្ឌកម្មនោះទេ។ ទណ្ឌកម្ម គឺមិនទំនងទាល់តែសោះ ហើយយើងមិនអាចសម្រេចបានអ្វីទាំងអស់ដោយប្រើប្រាស់វា” លោកបន្ថែមថា សហរដ្ឋអាមេរិក និងណាតូ “កំពុងផ្លាស់ប្តូរពីសង្រ្គាមមួយទៅសង្គ្រាមមួយផ្សេងទៀត”។
លោក Milanovic បានបន្ដថាការសម្រេចចិត្តលើការហ្វឹកហ្វឺនទាហានអ៊ុយក្រែន ឬការពាក់ព័ន្ធណាមួយនៅក្នុងជម្លោះរុស្ស៊ី-អ៊ុយក្រែន គួរតែជាជម្រើសរបស់ក្រូអាត ជំនួសឱ្យការបង្ខំដោយមហាអំណាចធំជាង។
លោក Milanovic បានសម្តែងការប្រឆាំងរបស់គាត់ម្តងហើយម្តងទៀត ចំពោះការចូលរួមរបស់ក្រូអាតក្នុងការហ្វឹកហ្វឺនទាហានអ៊ុយក្រែន ដោយអះអាងថាវាជា “ការសង្ស័យតាមផ្លូវច្បាប់”៕ ឈូក បូរ៉ា
