តេអេរ៉ង់៖ អ៊ីរ៉ង់ បានជំរុញឱ្យកូរ៉េខាងត្បូងបញ្ចេញទ្រព្យសម្បត្តិ ដែលជាប់គាំងរបស់ខ្លួន និងបានថ្កោលទោសប្រទេស អាស៊ីមួយនេះ សម្រាប់កិច្ចសហប្រតិបត្តិការ “មិនពេញចិត្ត” របស់ខ្លួនក្នុងការសងបំណុល។
អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani ត្រូវបានដកស្រង់សម្តីដោយទីភ្នាក់ងារ សារព័ត៌មានផ្លូវការ របស់អ៊ីរ៉ង់ IRNA ដែលបានឲ្យដឹងក្នុងសន្និសីទសារព័ត៌មានប្រចាំសប្តាហ៍ថា រដ្ឋាភិបាលកូរ៉េខាងត្បូង មានកាតព្វកិច្ចរក្សា សិទ្ធិ ស្របច្បាប់ របស់អ៊ីរ៉ង់ និងសងបំណុលរបស់ខ្លួនដោយគ្មានលក្ខខណ្ឌជាមុន។
គេប៉ាន់ប្រមាណថា អ៊ីរ៉ង់មានមូលនិធិដែលមានតម្លៃជាង ៧ពាន់លានដុល្លារ នៅក្នុងធនាគារកូរ៉េខាងត្បូងចំនួន ២ ដែលខ្លួន មិនអាចចូលបាន ដោយសារតែធនាគារ និងអាជ្ញាធរនៅក្នុងប្រទេសកូរ៉េខាងត្បូង បដិសេធមិនដំណើរការពួក គេព្រោះខ្លាចមាន ការពិន័យរបស់សហរដ្ឋអាមេរិក។
កូរ៉េខាងត្បូង គឺជាអតិថិជនដ៏ធំបំផុតមួយរបស់ប្រេងឆៅរបស់អ៊ីរ៉ង់មុនឆ្នាំ២០១៨ នៅពេលដែលទីក្រុងវ៉ាស៊ីនតោន បានដកខ្លួន ចេញពីកិច្ច ព្រមព្រៀងនុយក្លេអ៊ែរ ឆ្នាំ២០១៥ រវាងអ៊ីរ៉ង់ និងមហាអំណាចពិភពលោក ហើយបានដាក់ ទណ្ឌកម្មឯកតោភាគីឡើងវិញលើទីក្រុងតេអេរ៉ង់។
លោក Kanaani បានលើកឡើងថា រហូតមកដល់ពេលនេះ រដ្ឋាភិបាលកូរ៉េខាងត្បូង បានបដិសេធមិនបញ្ចេញ ទ្រព្យសកម្មរបស់អ៊ីរ៉ង់ ភាគច្រើនដែលត្រូវបានបង្កកនៅក្នុងធនាគាររបស់ខ្លួន សូម្បីតែរួមទាំងវត្ថុទាំងនោះ មិនស្ថិតនៅក្រោមការដាក់ទណ្ឌកម្មរបស់សហរដ្ឋអាមេរិកក៏ដោយ។
លោក Kanaani បានបន្ដថា អ៊ីរ៉ង់បានធ្វើការចរចាជាមួយកូរ៉េខាងត្បូងលើបញ្ហានេះ ដោយកត់សម្គាល់ថា អ៊ីរ៉ង់នឹងចាត់ វិធានការចាំបាច់ និងសមាមាត្រទាក់ទងនឹងកិច្ចសហប្រតិបត្តិការរបស់កូរ៉េខាងត្បូង៕
