ព្រុចសែល៖ អតិផរណាប្រចាំឆ្នាំ នៅក្នុងតំបន់ចាយប្រាក់អឺរ៉ូ ត្រូវបានគេរំពឹងថា នឹងធ្លាក់ចុះមកត្រឹម ៥,៥ ភាគរយនៅក្នុងខែមិថុនា ធៀបនឹង ៦,១ ភាគរយនៅក្នុងខែឧសភា នេះបើយោងតាមការប៉ាន់ប្រមាណ ដែលចេញផ្សាយ កាលពីថ្ងៃសុក្រដោយ Eurostat ដែលជាការិយាល័យស្ថិតិ របស់សហភាពអឺរ៉ុប។
កត្តាជំរុញសំខាន់នៃអតិផរណា នៅតំបន់ចាយប្រាក់អឺរ៉ូ នៅតែបន្តគឺតម្លៃអាហារ គ្រឿងស្រវឹង និងថ្នាំជក់ ដែលឃើញអតិផរណា ១១,៧ ភាគរយក្នុងខែមិថុនា។ ទោះជាយ៉ាងណាក៏ដោយ នេះតំណាងឱ្យនិន្នាការធ្លាក់ចុះរួចទៅហើយពីអតិផរណា ១២,៥ភាគរយនៅក្នុងខែឧសភា។
ទំនិញឧស្សាហកម្មមិនប្រើថាមពលត្រូវបានព្យាករថានឹងមានអតិផរណាប្រចាំឆ្នាំ ៥,៥ភាគរយនៅក្នុងខែមិថុនាធៀបនឹង ៥,៨ភាគរយនៅក្នុងខែឧសភា នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
តម្លៃសេវាកម្មទំនងជាកើនឡើងពីអតិផរណាប្រចាំឆ្នាំ ៥ភាគរយក្នុងខែឧសភាដល់ ៥,៤ ភាគរយនៅក្នុងខែមិថុនា។ តម្លៃថាមពលនៅតែបន្តមានកំណើនអវិជ្ជមាន ដោយបានធ្លាក់ចុះពីអតិផរណាពី -១,៨ ភាគរយក្នុងខែឧសភា ដល់ -៥,៦ ភាគរយនៅក្នុងខែមិថុនា។
បើនិយាយពីប្រទេសនីមួយៗ ស្លូវ៉ាគី កំពុងនាំមុខគេជាមួយនឹងអត្រាអតិផរណាប្រចាំឆ្នាំ ១១,៣ ភាគរយក្នុងខែមិថុនា បន្ទាប់មកដោយអេស្តូនីមាន ៩ភាគរយ និងក្រូអាតមាន ៨,៣ ភាគរយ។ ផ្ទុយទៅវិញ លុចសំបួ មានអតិផរណាទាបបំផុតពីមួយឆ្នាំទៅមួយឆ្នាំក្នុងខែមិថុនា គឺ ១ភាគរយ ដោយប្រទេសអេស្ប៉ាញ និងបែលហ្ស៊ិក បានចុះបញ្ជីអត្រាទាបបំផុតទីពីរគឺ ១,៦ ភាគរយ៕
ប្រែសម្រួល ឈូក បូរ៉ា
