បរទេស ៖ រដ្ឋមន្ត្រីការបរទេសហុងឌូរ៉ាស លោក Eduardo Enrique Reina បានឲ្យដឹងថា លោកបានអំពាវនាវឱ្យ ឯកអគ្គរដ្ឋទូតសហរដ្ឋអាមេរិក ប្រចាំនៅទីក្រុង Tegucigalpa លោកស្រី Laura Dogu បញ្ឈប់ការផ្តល់យោបល់ លើបញ្ហាផ្ទៃក្នុង និងអធិបតេយ្យភាព របស់ប្រទេសហុងឌូរ៉ាស រួមទាំងការតែងតាំង អគ្គមេធាវីស្តីទីថ្មី និងអនុប្រធានរបស់លោក ។
នៅក្នុងសន្និសិទសារព័ត៌មាន បន្ទាប់ពីជំនួបរបស់លោកជាមួយ Dogu ដែលគាត់បានប្រកាសកាលពីមួយថ្ងៃមុន Reina បានលើកឡើងថាលោកបានស្នើសុំឱ្យបេសកជនអាមេរិក “បញ្ឈប់ការផ្តល់យោបល់របស់នាងលើបញ្ហាផ្ទៃក្នុង” នៅក្នុងប្រទេសហុងឌូរ៉ាស ហើយបានសង្កត់ធ្ងន់ ទៅលើ “ការមិនពេញចិត្ត” របស់រដ្ឋាភិបាលហុងឌូរ៉ាស ជាមួយនឹងសេចក្តីថ្លែងការណ៍ពីមុន ដែលធ្វើឡើងដោយ នាងនិងមន្ត្រីជាន់ខ្ពស់អាមេរិកផ្សេងទៀត។
យោងតាមលោក Reina និងលោក Dogu បានឲ្យដឹងថា លោកស្រីនឹងធ្វើការពិគ្រោះយោបល់ ពាក់ព័ន្ធបន្ទាប់ពីកិច្ចប្រជុំនេះ ហើយនឹងជូន ដំណឹងដល់ទីក្រុងវ៉ាស៊ីនតោន អំពីជំហររបស់រដ្ឋាភិបាលហុងឌូរ៉ាស។
ទំនាក់ទំនងរបស់សហរដ្ឋអាមេរិក ជាមួយហុងឌូរ៉ាសមានភាពតានតឹង ចាប់តាំងពីគណៈកម្មការអចិន្ត្រៃយ៍ នៃសភាជាតិហុងឌូរ៉ាស បានតែងតាំងអគ្គមេធាវី ស្តីទីថ្មី និងអនុប្រធានរបស់លោកនៅថ្ងៃទី០១ ខែវិច្ឆិកា បន្ទាប់ពីសភា បានបរាជ័យក្នុងខែសីហាក្នុងការជ្រើស រើសពួកគេដោយការឯកភាព ហើយសហរដ្ឋអាមេរិកបានហៅទង្វើនេះ ប្រឆាំងនឹងលទ្ធិប្រជាធិបតេយ្យ ។
លោក Reina បានសង្កត់ធ្ងន់ថា ការសម្រេចចិត្តនេះគឺស្រប តាមរដ្ឋធម្មនុញ្ញ នៃប្រទេសហុងឌូរ៉ាស ហើយ “វាត្រូវតែគោរព” ដូច្នេះប្រទេសនៅអាមេរិកកណ្តាល នឹងមិនទទួលយកយោបល់ លើបញ្ហាដែលតំណាងឱ្យ “ការជ្រៀតជ្រែកជាក់លាក់ នៅក្នុងការសម្រេចចិត្តផ្ទៃក្នុង ដែលបានធ្វើឡើងនៅក្នុងប្រទេស ហុងឌូរ៉ាសនោះទេ “៕
ប្រែសម្រួល ឈូក បូរ៉ា
