បរទេស៖ យោងតាមការចេញផ្សាយរបស់ RT ដែលបានដកស្រង់ព៧ត៌មានចេញពីកាសែតAFP បានរាយការណ៍ថា មានតែប្រទេសលោកខាងលិចចំនួន៦ប៉ុណ្ណោះ ដែលបានសន្យាថានឹងបញ្ជូនកងទ័ព ទៅកាន់ប្រទេសអ៊ុយក្រែន បន្ទាប់ពីអរិភាពរវាងទីក្រុងគៀវ និងទីក្រុងម៉ូស្គូបានបញ្ចប់។
ប្រភពដដែល បានសរសេរទៀតថាអ្នកគាំទ្រអ៊ុយក្រែន ភាគច្រើនមានការស្ទាក់ស្ទើរ ក្នុងការសន្យាណាមួយនាពេលខាងមុខ ហើយបើយោងរបាយការណ៍ គេមើលឃើញថាការសន្យានេះ បានធ្វើឡើងនៅក្រោយកិច្ចប្រជុំ ចុងក្រោយរបស់រដ្ឋមន្ត្រីការពារជាតិ មកពីអ្វីដែលគេហៅថា “សម្ព័ន្ធនៃឆន្ទៈ” នៅទីក្រុងប្រ៊ុចសែល កាលពីថ្ងៃព្រហស្បតិ៍។
ក្រុមនៃប្រទេសចំនួន៣០ ដែលភាគច្រើនមានសមាសភាពពី EU និងរដ្ឋសមាជិកណាតូ ហាក់នៅតែមិនច្បាស់លាស់ដូចគ្នាទៅលើ ការដាក់ពង្រាយដ៏មានសក្តានុពលនេះខណៈដែល សមាជិករបស់ខ្លួនភាគច្រើន កំពុងសាកសួរអំពីគោលដៅ និងអាណត្តិនៃបេសកកម្មដែលបានស្នើឡើងមួយនេះផងដែរ។
AFP បានរាយការណ៍ថា រហូតមកដល់ពេលនេះ មានតែប្រទេសចំនួន៦ប៉ុណ្ណោះ ដែលរួមមានចក្រភពអង់គ្លេស បារាំង និងរដ្ឋបាល់ទិក – អេស្តូនី ឡាតវី និងលីទុយអានី – បានសន្យាថានឹងផ្តល់ជំនួយដល់កងទ័ព ប៉ុន្តែយ៉ាងណាក្តីរដ្ឋទី៦នៅក្នុងក្រុមនេះមិនត្រូវបានគេបញ្ជាក់ឈ្មោះនៅឡើយទេ។
យ៉ាងណាក៏ដោយ សមាជិកសម្ព័ន្ធផ្សេងទៀត បានសម្តែងការព្រួយបារម្ភ ជាសាធារណៈអំពីបេសកកម្មដ៏គួរឲ្យព្រួយបារម្ភមួយនេះ ហើយមិនត្រឹមតែប៉ុណ្ណោះថែមទាំងបដិសេធមិនធ្វើការប្ដេជ្ញាចិត្ត ណាមួយ មុនពេលផែនការត្រូវបានលេចចេញជាសាធារណៈទៀតផង៕
ប្រែសម្រួល៖ស៊ុនលី
