ព័ត៌មានជាតិ

សូមប្រុងប្រយ័ត្ន! ទឹកស្ទឹងសង្កែ ហក់ឡើងដល់ កម្រិតប្រកាសអាសន្នហើយ

ភ្នំពេញ៖ គិតមកទល់ពេលនេះ ក្រុងបាត់ដំបង កំពុងរងការជន់លិច តាមតំបន់មួយចំនួនហើយ ដោយសារល្បឿនទឹកហូរចាក់ ពីស្រុកសំឡូត ឆ្ពោះទៅបឹងទន្លេសាប តាមស្ទឹងសង្កែ។

ជាក់ស្ដែងបើតាមលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានឱ្យដឹងថា ជំនន់ស្ទឹងសង្កែ គិតត្រឹមម៉ោង ១៨:២០ នាទី នាថ្ងៃទី ១៦ ខែតុលា ឆ្នាំ ២០២១ នេះ ទឹកស្ទឹងសង្កែ នៅចំណុចក្រុងបាត់ដំបង មានកម្ពស់ ១៣,៩០ ម។

លោកបន្តថា ទឹកស្ទឹងសង្កែ នៅចំណុចក្រុងបាត់ដំបង នឹងបន្តកើនឡើងបន្ថែមទៀត ( អាចកើនដល់ ១៤,៥០ ម ) នាវេលាថ្ងៃត្រង់ ថ្ងៃទី ១៧ តុលា ឆ្នាំ ២០២១ ។ បន្ទាប់មក ទឹកនឹងចាប់ផ្ដើមស្រកចុះវិញ ។

លោកក៏បាន រំលឹកផងដែរថា កាលពីថ្ងៃទី ១៩ ខែតុលា ឆ្នាំ ២០២០ ទឹកស្ទឹងសង្កែនៅចំណុចក្រុងបាត់ដំបង ធ្លាប់បានកើនឡើងដល់កម្ពស់ ១៤,៨២ ម ។

លោក ផេង សិទ្ធី អភិបាលក្រុងបាត់ដំបង បានប ន្តអំពាវនាវ ដល់ប្រជាពលរដ្ឋរស់នៅ ក្នុងសង្កាត់ចំនួន៧ ជាពិសេសអ្នករស់នៅ តាមបណ្ដោយដងស្ទឹងសង្កែ សូមមេត្តាប្រុងប្រយ័ត្ន ចំពោះទឹកជំនន់ ខណៈពេលដែលកម្ពស់ទឹកហក់ឡើង ដល់ជាង១៣ម៉ែត្រហើយ។

លោក អភិបាលក្រុង បញ្ជាក់ថា «ដូច្នេះសូមប្រជាពលរដ្ឋ ក្នុងក្រុងបាត់ដំបង ទាំងអស់ ជាពិសេសអ្នកដែលនៅបណ្ដោយដងស្ទឹងសង្កែ សូមមេត្តាប្រុងប្រយ័ត្ន ប្រសិនបើមានមនុស្សចាស់ជរា អ្នកជំងឺ ឬក្មេងៗ សូមចល័តទៅទីទូលមានសុវត្ថិភាព ឬទៅស្នាក់នៅជាមួយបងប្អូន សាច់ញាតិដែលរស់នៅតំបន់មានសុវត្ថិភាព ជាបណ្ដោះអាសន្ន»៕

To Top
×