ព័ត៌មានជាតិ

រាជរដ្ឋាភិបាល​ សម្រេចផ្តល់ដី​ និងផ្ទះ​ ដែលលោក គង់ គាំ ស្ម័គ្រចិត្តប្រគល់ជូនរដ្ឋវិញ ទៅឱ្យ​ គ.ជ.ប

ភ្នំពេញ​ ៖​ រាជរដ្ឋាភិបាល​ បានសម្រេចផ្តល់ដី​ និងផ្ទះ​ ដែលលោក គង់ គាំ​ ស្ម័គ្រចិត្តប្រគល់ត្រឡប់ជូនក្រសួងការបរទេស​ និងសហប្រតិបត្តិការអន្តរជាតិវិញ ទៅឱ្យគណៈ កម្មាធិការជាតិរៀបចំការបោះឆ្នោត​ (គ.ជ.ប)។

ការលើកឡើងរបស់ សម្តេចតេជោ ហ៊ុន សែន បានធ្វើឡើងនៅក្នុងកិច្ចប្រជុំពេញអង្គគណៈរដ្ឋមន្ត្រី នៅថ្ងៃទី១៣ ខែមករា ឆ្នាំ២០២៣នេះ។

តាមសេចក្តីប្រកាសរបស់គណៈរដ្ឋមន្ត្រី បានឱ្យដឹងថា​ “រាជរដ្ឋាភិបាលសម្រេចផ្តល់ដី​ និងផ្ទះ​ ដែលជាទ្រព្យសម្បត្តិរដ្ឋ ដែលលោក គង់ គាំ បាន ស្ម័គ្រចិត្តប្រគល់ត្រឡប់ជូនក្រសួងការបរទេស​ និងសហប្រតិបត្តិការអន្តរជាតិវិញ ទៅឱ្យគណៈ កម្មាធិការជាតិរៀបចំការបោះឆ្នោត ដើម្បីប្រើប្រាស់ធ្វើជាទីស្នាក់ការរបស់ គ.ជ.ប”។

សូមរំលឹកថា​ យោងតាម​លិខិតផ្ញើជូន​ លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយនៅថ្ងៃទី១២ ខែមករា ឆ្នាំ២០២៣ លោក គង់ គាំ បានទទួលស្គាល់ថា ខ្លួនមានការឆ្គាំឆ្គង និងយល់មិនបានអស់អំពីបែបបទនៃការសុំកាន់កាប់ផ្ទះ និងដី។

ភ្លាមៗនោះ​ សម្ដេចតេជោ​ ហ៊ុន​ សែន​ នាយករដ្ឋមន្ដ្រីនៃកម្ពុជា​ បានសរសេរលេីហ្វេសប៊ុក​ នាយប់ថ្ងៃទី១២​ ខែមករា​ ឆ្នាំ២០២៣​ បានថ្លែងថា​ “ទីបំផុតដី និងផ្ទះ ដែលជាសម្បត្តិរដ្ឋត្រូវបាន លោក គង់ គាំ និងភរិយាផ្តិតមេដៃប្រគល់ជូនរដ្ឋវិញ បន្ទាប់ពីអង្គភាពប្រឆាំងអំពើពុករលួយធ្វើការជាមួយលោក គង់ គាំ និងគ្រួសាររយៈពេល​៣ម៉ោងកន្លះ”។

សម្ដេច​ បន្ដថា​ “កុំឲ្យយប់យូរសុបិនច្រើន​ ខ្ញុំសម្រេចមិនប្តឹងបន្តទៀតទេ​ គឺបញ្ចប់ត្រឹមការប្រគល់ផ្ទះ
នេះ​ជូនក្រសួងការបរទេសដែលអាចធ្វើ
នាសប្តាហ៍ក្រោយ”។

សូមរំលឹកថា​ ដី​ និងផ្ទះ​ ដែលលោក គង់ គាំ កំពុងរស់នៅ គឺជាដីកម្មសិទ្ធិរបស់ក្រសួងការបរទេសនត្រូវបានលោកចូលមករស់នៅ​ កាលពីឆ្នាំ១៩៨២៕

To Top