ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានបន្ដណែនាំដល់ប្រជាពលរដ្ឋខ្មែររស់នៅតាមបន្ទាត់ព្រំដែន មិនត្រូវជួលដីធ្លីឲ្យបរទេស ដើម្បីបញ្ចៀសកុំឲ្យមានភាពស្មុគស្មាញ និងបញ្ហាប្រឈមនានា។
ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគាររដ្ឋបាលសាលាខេត្តព្រៃវែង និងរោងតម្កល់ទូក ង វែងជាងគេលើពិភពលោក នាថ្ងៃទី៥ ខែឧសភា ឆ្នាំ២០២៣នេះ សម្ដេច ស ខេង បានថ្លែងថា «សូមណែនាំឱ្យអាជ្ញាធរគ្រប់លំដាប់ថ្នាក់ ព្រមទាំងប្រជាពលរដ្ឋរស់នៅតាមខ្សែបន្ទាត់ព្រំដែន មិនត្រូវឱ្យមានជាដាច់ខាតការជួលដីទៅឱ្យប្រជាជននៃប្រទេសជាប់ព្រំដែន ដើម្បីបញ្ចៀសកុំឱ្យមានភាពស្មុគស្មាញ និងបញ្ហាប្រឈមនានាពាក់ព័ន្ធការកំណត់ព្រំដែន ពិសេសកិច្ចការពារបូរណភាពទឹកដីដែលជាភារកិច្ចស្នូលបំផុតរបស់ពួកយើងទាំងអស់គ្នា មិនថាថ្នាក់ដឹកនាំ មន្ត្រី ឬប្រជាពលរដ្ឋនោះឡើយ»។
នាឱកាសនោះ សម្ដេច ឧបនាយករដ្ឋមន្ដ្រី ក៏ផ្ដាំផ្ញើដល់ថ្នាក់ដឹកនាំ និងមន្ដ្រីរាជការស៊ីវិល នៃសាលាខេត្តព្រៃវែងគ្រប់លំដាប់ថ្នាក់ទាំងអស់ ត្រូវបន្តខិតខំរៀនសូត្រ ក្នុងការបង្កើនចំណេះដឹង និងពង្រឹងសមត្ថភាពដើម្បី ប្រសិទ្ធភាពការងារឲ្យបានតាមទិសស្លោក «ធ្វើឱ្យបាន ធ្វើឱ្យលឿន និងមានតម្លាភាព» ក្នុងការផ្តល់សេវាសាធារណៈជូនប្រជាពលរដ្ឋ និងការយកចិត្តទុកដាក់ដោះស្រាយរាល់បញ្ហា សំណូមពរ និងខិតខំកាត់បន្ថយការថ្នាំងថ្នាក់របស់ពលរដ្ឋ។
សម្ដេច បានស្នើថ្នាក់ដឹកនាំ និងមន្ត្រីគ្រប់លំដាប់ថ្នាក់ ត្រូវបន្តលើកកម្ពស់ប្រសិទ្ធភាព និងគុណភាពក្នុងការផ្តល់សេវាសាធារណៈគ្រប់ប្រភេទ ជាពិសេសសេវារដ្ឋបាលដើម្បីទទួល បានជំនឿទុកចិត្ត និងការពេញចិត្តពីប្រជាពលរដ្ឋ បន្តបង្ការ ទប់ស្កាត់ និងបង្ក្រាបរាល់បទល្មើស លួច ឆក់ ប្លន់ ល្បែងស៊ីសង ខុសច្បាប់ និងបទល្មើសគ្រប់ប្រភេទ ដើម្បីធានាសុវត្ថិភាពជូនប្រជាពលរដ្ឋ និងបន្តយកចិត្តទុកដាក់ខ្ពស់ និងអនុវត្តឱ្យបានម៉ឺងម៉ាត់ចំពោះការបង្ការ ទប់ស្កាត់ បង្ក្រាប បទល្មើសគ្រឿងញៀន ព្រមទាំងអនុវត្តឱ្យមានប្រសិទ្ធភាពនូវគោលនយោបាយ ភូមិ ឃុំ សង្កាត់ មានសុវត្ថិភាព៕
