ភ្នំពេញ: លោក សយ សុភាព អគ្គនាយកមជ្ឈមណ្ឌលព័ត៌មានដេីមអម្ពិលនៅព្រឹកថ្ងៃទី៨ ខែវិច្ឆិកា ឆ្នាំ២០១៩នេះ បានដឹកនាំសហការីមកដល់ច្រកព្រំដែនអន្តរជាតិ ប៉ោយប៉ែតហេីយ។
លោកសយសុភាពសង្កេតឃើញថា ស្ថានភាពនៅច្រកព្រំដែននេះមានសភាពធម្មតាដូចសព្វមួយដង ប្រជាពលរដ្ឋ និងអាជីវករធ្វេីដំណេីរចេញចូល ដោះដូរទំនិញ និងប្រកបរបរចិញ្ចឹមជីវិតជាប្រក្រតី។
ចំពោះស្ថានភាពនៅតាមបណ្ដា ច្រកព្រំដែននេះអគ្គនាយកដ្ឋានអន្តោប្រវេសន៍ បានឲ្យដឹងថា មិនមានប្រជាពលរដ្ឋខ្មែររាប់មុឺននាក់ សម្រុកចូលស្រុកខ្មែ រ ឡេីយ។
ការលេីកឡេីងបែបនេះ ក្រោយពី គណនីយហ្វេសប៊ុក ឈ្មោះ Ratanakraksmey Ly នៅថ្ងៃទី៧ វិច្ឆិកា នេះបានផ្សព្វផ្សាយព័ត៌មាន រូបភាព និង វីដេអូ ដោយនិយាយថា មានបងប្អូនពលករ ពលការិនី ខ្មែរនៅថៃរាប់ម៉ឺននាក់ កំពុងរង់ចាំសម្រុកចូលមកកម្ពុជា ។
យោងតាម គេហទំព័រ ហ្វេសប៊ុក របស់ អគ្គនាយកដ្ឋានអន្តោប្រវេសន៍ បានសរសេរ ថា “សូមជម្រាបជូនដល់សាធារណជន ឲ្យបានជ្រាបថា ព័ត៌មាន និង រូបភាព ទាំងអស់នេះគឺជាការបំភ្លៃទាំងស្រុង”។
អគ្គនាយកដ្ឋានអន្តោប្រវេសន៍ បន្ថែមថា រាល់បណ្តាច្រកព្រំដែន អន្តរជាតិ កម្ពុជា ថៃ ទាំងអស់ពុំមានស្ថានភាព ដូចនេះឡើយ គឺមានសភាពធម្មតា ពុំមានការកកកុញ ឬចំនួនចេញ ចូលខុសប្រក្រតីនោះទេ៕
