គៀវ៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី២១ ខែឧសភា ឆ្នាំ២០២២ថា កាលពីថ្ងៃសុក្រលោក Volodymyr Zelenskyy ប្រធានាធិបតីអ៊ុយក្រែន បានស្នើកិច្ចព្រមព្រៀងផ្លូវការជាមួយសម្ព័ន្ធមិត្តរបស់ប្រទេសនេះ ដើម្បីទទួលបានសំណងពីរុស្ស៊ីសម្រាប់ការខូចខាតដែលកងកម្លាំងរបស់ខ្លួនបានបង្កឡើងក្នុងអំឡុងសង្គ្រាម ។
លោក Zelenskyy ដែលថ្លែងថា រុស្ស៊ីកំពុងព្យាយាមបំផ្លាញហេដ្ឋារចនាសម្ព័ន្ធរបស់អ៊ុយក្រែនឱ្យបានច្រើនតាមដែលអាចធ្វើទៅបាន ដោយបានថ្លែងថា កិច្ចព្រមព្រៀងបែបនេះនឹងបង្ហាញឱ្យឃើញប្រទេសនានារៀបចំផែនការសកម្មភាពឈ្លានពានដែលពួកគេនឹងត្រូវចំណាយសម្រាប់សកម្មភាពរបស់ពួកគេ ។
លោកបានថ្លែងដូច្នេះនៅក្នុងវីដេអូមួយថា “យើងសូមអញ្ជើញប្រទេសជាដៃគូឱ្យចុះហត្ថលេខាលើកិច្ចព្រមព្រៀងពហុភាគី និងបង្កើតយន្តការមួយដើម្បីធានាថាអ្នកគ្រប់គ្នាដែលទទួលរងពីសកម្មភាពរបស់រុស្ស៊ី អាចទទួលបានសំណងសម្រាប់ការខាតបង់ទាំងអស់ដែលបានកើតឡើង” ។
លោក Zelenskyy បានលើកឡើងថា ក្រោមកិច្ចព្រមព្រៀងបែបនេះ ជាមូលនិធិ និងទ្រព្យសម្បត្តិរបស់រុស្ស៊ី ក្នុងប្រទេសជាហត្ថលេខីនឹងត្រូវរឹបអូស ។ បន្ទាប់មកពួកគេនឹងត្រូវបញ្ជូនទៅមូលនិធិសំណងពិសេស ។
លោកបានថ្លែងថា “ករណីនេះនឹងយុត្តិធម៌ ហើយរុស្ស៊ី នឹងមានអារម្មណ៍យល់ថា ជារឿងធ្ងន់ធ្ងរណាស់ ចំពោះគ្រាប់មីស៊ីល គ្រាប់បែក និងសំបកគ្រាប់ផ្ទុះទាំងអស់ដែលរុស្ស៊ីបានបាញ់មកលើពួកយើង” ។
គួររំលឹកថា ប្រទេសកាណាដា បានលើកឡើងកាលពីខែមុនថា ខ្លួននឹងផ្លាស់ប្តូរច្បាប់ដាក់ទណ្ឌកម្មរបស់ខ្លួន ដើម្បីអនុញ្ញាតឱ្យទ្រព្យសម្បត្តិបរទេសរឹបអូស និងដាក់ទណ្ឌកម្មត្រូវបានចែកចាយឡើងវិញជាសំណងដល់ជនរងគ្រោះ ឬដើម្បីជួយក្នុងការកសាងរដ្ឋបរទេសឡើងវិញពីសង្គ្រាម ៕
ប្រែសម្រួលដោយ៖ ម៉ៅ បុប្ផាមករា
