តូក្យូ៖ ប្រភពដែលដឹងអំពីបញ្ហានេះបានឲ្យដឹងថា ក្រសួងការពារជាតិជប៉ុន នឹងស្វែងរកថវិកាកម្រិតខ្ពស់ជាង ៧ ពាន់ពាន់លានយ៉េន (៤៩ពាន់លានដុល្លារ) សម្រាប់ឆ្នាំសារពើពន្ធបន្ទាប់ ដែលជាការផ្លាស់ប្តូរមួយស្របតាមយុទ្ធសាស្ត្រសន្តិសុខថ្មីរបស់ជប៉ុន ដើម្បីបង្កើនការចំណាយលើការការពារប្រចាំឆ្នាំរបស់ខ្លួនទ្វេដង។
ផែនការចំណាយលើវិស័យការពារជាតិ សម្រាប់ឆ្នាំដែលចាប់ផ្តើមពីខែមេសា អាចលើសពីកំណត់ត្រានៃឆ្នាំសារពើពន្ធបច្ចុប្បន្ន ៦ ,៨ ពាន់ពាន់លានយ៉េន ប្រសិនបើសំណើនេះត្រូវបានទទួលយក។ ការកើនឡើងនេះឆ្លុះបញ្ចាំងពីកិច្ចខិតខំប្រឹងប្រែងកាន់តែខ្លាំងរបស់ជប៉ុនក្នុងការដោះស្រាយបញ្ហាប្រឈមផ្នែកសន្តិសុខធ្ងន់ធ្ងរដែលបង្កឡើងដោយប្រទេសចិន កូរ៉េខាងជើង និងរុស្ស៊ី។
សំណើថវិកានាពេលខាងមុខ ដែលនឹងត្រូវធ្វើឡើងនៅចុងខែនេះ នឹងរួមបញ្ចូលថវិកា ដើម្បីពន្លឿនការដាក់ឱ្យប្រើប្រាស់មីស៊ីលរយៈចម្ងាយឆ្ងាយ ដែលផលិតក្នុងស្រុក ខណៈដែលប្រទេសនេះបានប្តេជ្ញាថា នឹងទទួលបានសមត្ថភាពក្នុងការវាយប្រហារទឹកដីសត្រូវ ដែលហៅថា “សមត្ថភាពប្រឆាំងការវាយប្រហារ” ។
ក្នុងនាមជាសសរស្តម្ភនៃសមត្ថភាពទាំងនោះ ប្រទេសជប៉ុន មានគោលបំណងពង្រីកជួរនៃមីស៊ីលនាំផ្លូវពីដីទៅកប៉ាល់ធុន Type-12 របស់កងកម្លាំងស្វ័យការពារដីគោកដល់ ១០០០ គីឡូម៉ែត្រពីចម្ងាយ ១០០គីឡូម៉ែត្របច្ចុប្បន្ន និងអភិវឌ្ឍអាវុធល្បឿនលឿន ដើម្បីការពារពីចម្ងាយភាគនិរតីរបស់ប្រទេសដីកោះមួយនេះ៕
ប្រែសម្រួល ឈូក បូរ៉ា
