បរទេស៖ យោងតាមការចេញផ្សាយរបស់ RT ប្រធានាធិបតីរុស្ស៊ី លោក Vladimir Putin បានគូសបញ្ជាក់ពីភាពជាដៃគូស្មើភាពគ្នារវាងរដ្ឋាភិបាលទីក្រុងមូស្គូ និងទីក្រុងប៉េកាំង ដោយសង្កត់ធ្ងន់លើកិច្ចសហប្រតិបត្តិការជិតស្និទ្ធរបស់ពួកគេ ដែលជាកត្តាសំខាន់ក្នុងស្ថិរភាពពិភពលោក។
ថ្លែងនៅក្នុងកិច្ចប្រជុំប្រព័ន្ធផ្សព្វផ្សាយ BRICS កាលពីថ្ងៃសុក្រ លោកបានបន្ថែមថា ប្រទេសទាំងពីរ បានគិតគូរពីផលប្រយោជន៍របស់គ្នាទៅវិញទៅមកហើយតែងតែស្តាប់គ្នាទៅវិញទៅមក។
លោក Putin បានរិះគន់រដ្ឋាភិបាលទីក្រុងវ៉ាស៊ីនតោនចំពោះការអូសទាញសម្ព័ន្ធមិត្តអឺរ៉ុបរបស់ខ្លួនចូលទៅក្នុងជម្លោះជាមួយប្រទេសចិនហើយ លោកបានអះអាងថា សហរដ្ឋអាមេរិកកំពុងតែបន្តអនុវត្តគោលនយោបាយហួសសម័យ ដើម្បីទប់ទល់នឹងការកើនឡើងសេដ្ឋកិច្ចរបស់ទីក្រុងប៉េកាំង ដែលជាក់ស្តែងវាកំពុងធ្វើឲ្យប៉ះពាល់ដល់សេដ្ឋកិច្ចរបស់ខ្លួន។
លោក Putin បានអះអាងថា ម៉្យាងវិញទៀត ទីក្រុងវ៉ាស៊ីនតោនបាននឹងកំពុងបន្តគោលនយោបាយប្រឆាំងផលិតភាពនៅអាស៊ី និងបញ្ចុះបញ្ចូលដៃគូអឺរ៉ុបរបស់ខ្លួនឱ្យធ្វើដូចគ្នានេះដែរ។
លោក Putin ក៏បានសង្កត់ធ្ងន់ដែរថា ឥឡូវនេះ វាមិនអាចទៅរួចទេសម្រាប់សហរដ្ឋអាមេរិកក្នុងការបញ្ឈប់ការអភិវឌ្ឍរបស់ប្រទេសចិន ហើយថាទីក្រុងវ៉ាស៊ីនតោនគឺយឺតពេល ១៥ ឆ្នាំទៅហើយក្នុងការប៉ុនប៉ងធ្វើកិច្ចការងារនេះ៕
ប្រែសម្រួល៖ ស៊ុនលី
