បរទេស៖យោងតាមការ ចេញផ្សាយរបស់ RT ប្រធានាធិបតីតួគីលោក Recep Tayyip Erdogan បានសន្យាថានឹងបង្កើន លំហូរពាណិជ្ជកម្មរវាងប្រទេសតួគី និងរុស្ស៊ីបន្ទាប់ពីការសន្ទនា តាមទូរស័ព្ទជាមួយប្រធានាធិបតីរុស្ស៊ីលោក Vladimir Putin កាលពីថ្ងៃអាទិត្យ។
នៅក្នុងសេចក្តីថ្លែងការណ៍មួយ ដែលបានចេញផ្សាយ បន្ទាប់ពីការហៅទូរស័ព្ទ ការិយាល័យរបស់លោក Erdogan បាននិយាយថា លោក និងលោក Putin បានពិភាក្សាអំពីទំនាក់ទំនងទ្វេភាគីតួគី-រុស្ស៊ី ក៏ដូចជាបញ្ហាក្នុងតំបន់ និងពិភពលោកផងដែរ។
ក្នុងនោះដែរលោក Erdogan បានបញ្ជាក់ថា លោកមានគោលបំណងបន្តកិច្ចសហប្រតិបត្តិការរវាងតួគី និងរុស្ស៊ីក្នុងវិស័យជាច្រើនជាពិសេសតាមរយៈការពង្រីកទំហំពាណិជ្ជកម្មរវាងប្រទេសទាំងពីរផ្ទាល់តែម្តង។
គួរឲ្យដឹងដែរថាវិមានក្រឹមឡាំងបានចេញសេចក្តីថ្លែងការណ៍ស្រដៀងគ្នានេះដោយបញ្ជាក់ថាលោក Erdogan និងលោក Putin បាននិយាយអំពីប្រធានបទអន្តរជាតិ មួយចំនួនហើយបានដាក់ ការសង្កត់ធ្ងន់លើការបង្កើនប្រសិទ្ធភាព នៃកិច្ចសហប្រតិបត្តិ ការពាណិជ្ជកម្មនិងសេដ្ឋកិច្ច ។
យ៉ាងណាក្តីទោះបីជាប្រទេសតួគី គឺជាសមាជិកនៃប្លុក NATO ដឹកនាំដោយសហរដ្ឋអាមេរិក និងជាសមាជិកដែលប្រាថ្នាចង់ បានរបស់ EU ក៏ដោយក៏លោក Erdogan បានអនុម័តគោលនយោបាយ អព្យាក្រឹតភាពលើជម្លោះអ៊ុយក្រែន។
បន្ថែមពីលើការធ្វើជាម្ចាស់ផ្ទះ កិច្ចចរចាសន្តិភាព ក្នុងឆ្នាំ២០២២ប្រទេសតួគី បានគាំទ្រគំនិតផ្តួចផ្តើមគ្រាប់ធញ្ញជាតិ សមុទ្រខ្មៅដែលធ្លាប់ជាប់គាំង ហើយបានបដិសេធសំណើ របស់សហរដ្ឋអាមេរិក ក្នុងការដាក់ទណ្ឌកម្ម សេដ្ឋកិច្ចលើទីក្រុងមូស្គូទៀតផង៕
ប្រែសម្រួល៖ស៊ុនលី
