តូក្យូ៖ ធនាគារ MUFG បានបណ្តេញនិយោជិតម្នាក់ចេញពីការងារ ពីបទលួចទ្រព្យសម្បត្តិ ដែលមានតម្លៃចន្លោះពី ១ពាន់លាន ទៅ ២ពាន់លានយ៉េន ប្រហែល ៦លានដុល្លារ ពីប្រអប់សុវត្ថិភាពរបស់អតិថិជន ៦០នៅទីក្រុងតូក្យូ។
កម្មការិនីរូបនេះត្រូវបានបញ្ឈប់ពីការងារ កាលពីថ្ងៃទី១៤ ខែវិច្ឆិកា បន្ទាប់ពីសារភាពថា បានលួចទ្រព្យសម្បត្តិនៅសាខាចំនួន២ ចាប់ពីខែមេសា ឆ្នាំ២០២០ ដល់ខែតុលា ឆ្នាំនេះ ។ ធនាគារនេះកំពុងស៊ើបអង្កេតករណីលួចនេះ និងប្រឹក្សាជាមួយប៉ូលិស។
ធនាគារបានឲ្យដឹងថាការលួច បានកើតឡើងនៅសាខា Nerima និង Tamagawa ហើយតម្លៃពិតប្រាកដ ដែលត្រូវបានលួចកំពុងត្រូវបាន ស៊ើបអង្កេតនៅឡើយ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានក្យូដូជប៉ុន។
ហេតុការណ៍នេះបានកើតឡើង នៅថ្ងៃទី៣១ ខែតុលា បន្ទាប់ពីធនាគារទទួលបានការសាកសួរពីអតិថិជនម្នាក់។ ធនាគារបានបញ្ជាក់ថាមិនមានឧប្បត្តិហេតុ ស្រដៀងគ្នានេះនៅសាខាផ្សេងទៀតនោះទេ បន្ទាប់ពីបានធ្វើការវាយតម្លៃគ្រាអាសន្ន។
ធនាគារ MUFG បានឲ្យដឹងនៅក្នុងសេចក្តីថ្លែងការណ៍មួយថា “អតីតបុគ្គលិកមានទំនួលខុសត្រូវ ក្នុងការគ្រប់គ្រងប្រអប់ដាក់ប្រាក់សុវត្ថិភាព និងបានទាញយកអត្ថប្រយោជន៍ពីមុខតំណែងនេះ ដើម្បីបើកសុវត្ថិភាពរបស់អតិថិជន ដោយគ្មានការអនុញ្ញាត និងលួចទ្រព្យសម្បត្តិរបស់ពួកគេ” ។
ធនាគារបានបរាជ័យក្នុងការទប់ស្កាត់ឧបទ្ទវហេតុនេះ ទោះបីជាមានច្បាប់តឹងរ៉ឹងគ្រប់គ្រង ការគ្រប់គ្រងប្រអប់ប្រាក់បញ្ញើដោយសុវត្ថិភាព និងប្រព័ន្ធដែលការត្រួតពិនិត្យតាមកាលកំណត់ ត្រូវបានធ្វើឡើងដោយភាគីទីបីក៏ដោយ ៕
ប្រែសម្រួល ឈូក បូរ៉ា
