បរទេស៖ យោងតាមអាជ្ញាធរអាកាសយានដ្ឋានបានឱ្យដឹងថា យន្តហោះរបស់ក្រុមហ៊ុនអាកាសចរណ៍ Japan Airlines ដែលកំពុងធ្វើដំណើរយឺតៗ នៅឯអាកាសយានដ្ឋានអន្តរជាតិ Seattle-Tacoma International Airport (SEA) ត្រូវបានគេឃើញថា បានបុកកន្ទុយរបស់យន្តហោះ Delta ដែលកំពុងចត នៅថ្ងៃពុធ ទី ៥ ខែកុម្ភៈ ។
យោងតាមគេហទំព័រ Yahoo News ចេញផ្សាយនៅថ្ងៃទី៦ ខែកុម្ភៈ ឆ្នាំ២០២៥ បានឱ្យដឹងថា សេចក្តីថ្លែងការណ៍របស់ SEA បានកត់សម្គាល់ថា មិនមានការរងរបួសនោះទេ ប៉ុន្តែមានការរំខានតិចតួចដល់ ប្រតិបត្តិការអាកាសយានដ្ឋាន ដោយសារឧបទ្ទវហេតុកើតឡើង នៅលើផ្លូវបត់របស់យន្តហោះ។
នៅក្នុងសេចក្តីថ្លែងការណ៍មួយទៅកាន់ KING News ក្រុមហ៊ុន Delta បាននិយាយថា “ខណៈពេលដែលកំពុងស្ថិតក្នុងដំណើរការបត់ កន្ទុយនៃយន្តហោះ Delta 737 ត្រូវបានគេរាយការណ៍ថា បានប៉ះជាមួយនឹងចុងស្លាបនៃយន្តហោះ របស់ក្រុមហ៊ុនអាកាសចរណ៍មួយផ្សេងទៀត។ មិនមានរបាយការណ៍អំពីការរងរបួសសម្រាប់នាវិក ឬអតិថិជននៅលើជើងហោះហើរនោះទេ ហើយយើងសូមអភ័យទោសចំពោះការរំខាន និងការពន្យារពេលក្នុងការធ្វើដំណើរ។
រដ្ឋបាលអាកាសចរណ៍សហព័ន្ធបាននិយាយថា ជើងហោះហើរមួយចំនួនត្រូវបាន ផ្អាកជាបណ្តោះអាសន្ន ដោយសារឧបទ្ទវហេតុនេះ៕
ប្រែសម្រួលៈ ណៃ តុលា
