បរទេស៖ រដ្ឋាភិបាលថៃ បានអញ្ជើញតំណាងមកពីវេទិកាប្រព័ន្ធផ្សព្វផ្សាយសង្គមមួយចំនួន រួមទាំង Facebook និង TikTok ដើម្បីពិភាក្សាអំពីវិធីដោះស្រាយការបោកប្រាស់តាមអ៊ីនធឺណិត។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី២១ ខែកុម្ភៈ ឆ្នាំ២០២៥ បានឱ្យដឹងថា ប្រធានគណៈកម្មាធិការផ្នែកទំនាក់ទំនង ទូរគមនាគមន៍ សេដ្ឋកិច្ចឌីជីថល និងសង្គម របស់សភាថៃ លោក Siam Hathasongkorh បាននិយាយកាលពីម្សិលមិញថា កិច្ចប្រជុំនេះត្រូវបានកោះប្រជុំ ខណៈដែលចំនួនមនុស្សដែលរងគ្រោះដោយការបោកប្រាស់តាមអ៊ីនធឺណិតនៅលើ Facebook និង TikTok បន្តកើនឡើង។
មន្ត្រីមកពីការិយាល័យស៊ើបអង្កេតឧក្រិដ្ឋកម្មតាមអ៊ីនធឺណិត (CCIB) និងមជ្ឈមណ្ឌលប្រឆាំងឧក្រិដ្ឋកម្មតាមអ៊ីនធឺណិត (AOC) បានចូលរួមក្នុងកិច្ចពិភាក្សានេះ ដែលផ្តោតលើលទ្ធភាពនៃការដាក់កម្រិតបន្ថែមទៀតលើការចូលប្រើអ៊ីនធឺណិតនៅតាមព្រំដែនថៃ-មីយ៉ាន់ម៉ា ដែលក្រុមបោកប្រាស់ជាច្រើនត្រូវបានគេស្គាល់ថា ដំណើរការ។
នៅពេលត្រូវបានសួរអំពីផែនការរបស់រដ្ឋាភិបាលក្នុងការទប់ស្កាត់មនុស្សកាន់តែច្រើនពីការធ្លាក់ខ្លួនរងគ្រោះដោយការបោកប្រាស់តាមអ៊ីនធឺណិត លោក Siam បាននិយាយថា ក្រសួងសេដ្ឋកិច្ច និងសង្គមឌីជីថល រួមជាមួយនឹងគណៈកម្មាធិការជាតិផ្សព្វផ្សាយ និងទូរគមនាគមន៍ (NBTC) កំពុងធ្វើការរួមគ្នាដើម្បីបង្កើនការយល់ដឹងជាសាធារណៈអំពីការ បោកប្រាស់ នេះ។
លោកបានជំរុញឱ្យសាធារណជន កុំឱ្យអើពើការហៅទូរស័ព្ទដែលគួរឱ្យសង្ស័យពីលេខដែលមិនស្គាល់អត្តសញ្ញាណ ដោយលើកឡើងពីករណីថ្មីៗនេះដែលនិស្សិតសាកលវិទ្យាល័យមួយត្រូវបានបង្ខិតបង្ខំឱ្យផ្ទេរប្រាក់ជាង ៥០០.០០០ បាតទៅឱ្យអ្នកបោកប្រាស់។ លោកបានបន្តថា ជនរងគ្រោះបានលើកទូរស័ព្ទពីលេខអនាមិក ហើយបានចំណាយពេលជាង ១៧ ម៉ោងតាមទូរស័ព្ទជាមួយជនឆបោក៕
ប្រែសម្រួលៈ ណៃ តុលា
